अभिनेता पल शाहविरुद्ध जिल्ला अदालत नवलपरासी (बर्दघाट सुस्ता पूर्व) मा बलात्कार मुद्दा दर्ता भएको छ । जिल्ला सरकारी वकिलको कार्यालयले बिहीवार दिउँसो शाहविरुद्ध अभियोगपत्र दायर गरेको हो । एक नाबालिग गायिकाले जबर्जस्ती करणीको अभियोगमा दिएको जाहेरीको आधारमा अहिले प्रहरीले उनलाई पक्राउ गरी अनुसन्धान गरिरहेको छ ।
मुलुकी अपराध संहिता २०७४ को दफा २१९ को उपदफा १ र २ बमोजिम कसुरदार ठहर गर्दै सरकारी वकिलको कार्यालयले अभियोगपत्र दायर गरेको हो । जिल्ला सरकारी वकिल कार्यालयका सहायक जिल्ला न्यायाधिवक्ता डालबहादुर नेपालीका अनुसार, शाहविरुद्ध मुलुकी अपराध संहिता २०७४ को दफा २१९ को (३) को (ग) अनुसार सजाय माग गरिएको छ । जसमा १४ देखि १६ वर्षसम्मकी बालिका बलात्कार गरेकामा १२ देखि १४ वर्ष सजाय हुने उल्लेख छ । सोही अनुसारको सजाय माग दाबी गरिएको नेपालीले बताए ।
त्यस्तै, यौन हिंसा अध्यादेश २०७७ मा चार लाखसम्म जरिवाना हुनसक्ने उल्लेख छ । सोही अनुसार चार लाख रुपैयाँ क्षतिपूर्तिको समेत माग दाबी गरिएको सहायक जिल्ला न्यायाधिवक्ता नेपालीले बताए । अभियोगपत्रमा शाहलाई तनहुँबाट झिकाउने भन्ने पनि उल्लेख छ । तनहुँबाट झिकाएपछि मात्र थुनछेक बयान सुरु हुनेछ ।
फागुन ११ गते नाबालिगले शाहविरुद्ध तनहुँ प्रहरी कार्यालयमा जाहेरी दिएकी थिइन् । त्यसपछि नवलपरासीमा पनि नाबालिगले जाहेरी दिएकी थिइन् । तनहुँ प्रहरी कार्यालयमा जाहेरी परेको चार दिनपछि प्रहरीसमक्ष आत्मसमर्पण गरेका पल शाहसँग अहिले तनहुँ प्रहरीले हिरासतमा राखेर अनुसन्धान गरिरहेको छ । गत हप्ता शाहलाई अनुसन्धानका लागि तनहुँबाट नवलपरासी पनि लगिएको थियो । नवलपसारीमा अनुसन्धानपछि शाहलाई तनहुँ फर्काइएको छ ।