नवलपरासी अदालतले पनि दियो पल शाहलाई थुनामा राख्न आदेश

एक नाबालिग गायिकालाई जबर्जस्ती करणी गरेको अभियोगमा मुद्दा खेपिरहेका अभिनेता पल शाहलाई जिल्ला अदालत नवलपरासीले पनि पुर्पक्षका लागि थुनामा राख्ने आदेश दिएको छ । बुधवार न्यायाधीश अर्जुन अधिकारीको इजलासले मुद्दाको किनारा लगाउने समयसम्म तनुहँमै थुनामा राखेर अनुसन्धान गर्न आदेश दिएको हो ।

अदालतको आदेश लगत्तै पल शाहलाई बुधबार नै तनहुँ पठाइएको छ । तनहुँबाट आएको सुरक्षाकर्मीको टोलीले बुधबार राति ९ बजे शाहलाई तनहुँ लगेको हो । वैशाख ७ गते पुनः जिल्ला अदालत पूर्वी नवलपरासीमा हाजिर हुन भनिएको छ । यसअघि चैत १० गते तनहुँ जिल्ला अदालतले पनि शाहलाई पुर्पक्षका लागि थुनामा राख्न आदेश दिएको थियो ।

अभिनेता शाहले एक वर्षअघि गैंडाकोटमा छायांकनको क्रममा नाबालिगलाई मादक पदार्थ खुवाएर बलात्कार गरेको भन्दै गत फागुनमा इलाका प्रहरी कार्यालय गैंडाकोटमा किटानी जाहेरी परेको थियो । जाहेरीका आधारमा प्रहरीले शाहलाई चैत ३ गते जिल्ला अदालतमा मुद्दा दर्ता गराएर अनुसन्धान थालेको हो । शाहलाई तनहुँ प्रहरी कार्यालयमा पनि उनै नाबालिगले एक वर्षअघि बलात्कार गरेको भन्दै उजुरी दिएकी थिइन् ।