अभिनेता राज घिमिरे (सानु राजा घिमिरे) काठमाडौंको गोदावरी नगरपालिका वडा नं. ३ को वडा अध्यक्षमा विजयी भएका छन् । उनी नेकपा माओवादी केन्द्रबाट वडाध्यक्षमा निर्वाचित भएका हुन् । निकटतम प्रतिद्वन्द्वी नेकपा एमालेका राम आचार्यलाई ११ मतले पछि पार्दै उनले जित हासिल गरेका हुन् ।
राज अघिल्लो स्थानीय निर्वाचनमा पनि वडा अध्यक्षमा उठेका थिए । तर, त्यसबेला उनी पराजित भएका थिए । वडा अध्यक्षमा निर्वाचित भएपछि घिमिरेले आफूले जितेको वडालाई देशकै नमुना बनाउने प्रतिवद्धता व्यक्त गरेका छन् । निर्वाचन हुनुभन्दा अगाडि उनले आफूले वडा अध्यक्षमा जित हासिल गरे कुनै पनि सुविधा नलिने घोषणा गरेका थिए ।
राजले सुपरहिट चलचित्र ‘चपली हाइट’बाट अभिनय करिअर सुरु गरेका थिए । यसपछि ‘भिजिलान्ते’ लगायतका केही चलचित्र र केही म्यूजिक भिडियोमा पनि अभिनय गरेका उनी पछिल्लो समय राजनीति र होटल व्यवसायमा सक्रिय छन् । उनले केही वर्षयता चलचित्रमा अभिनय गरेका छैनन् ।