साउथकी चर्चित अभिनेत्री रश्मिका मन्दानाले आफू अभिनीत चलचित्र ‘पुष्पा’ को ‘सामी सामी’ गीतमा नृत्य गर्ने नेपाली बालिकासँग भेट गर्ने इच्छा व्यक्त गरेकी छन् । मकवानपुर हेटौंडाकी स्कुले ती बालिकाले नृत्य गरेको भिडियो हेरेपछि रश्मिकाले ट्विटरमार्फत् भेट्ने इच्छा जताएकी हुन् ।
नेपाली बालिकाले नृत्य गरेको भिडियो ट्विटरमा शेयर गर्दै उनले लेखेकी छन्, ‘मेड माइ डे । म यो प्यारीलाई भेट्न चाहन्छु । कसरी भेट्न सक्छु ?’ ‘सामी सामी’ गीतमा यसअघि लाखौंको संख्यामा नेपालीहरुले टिकटक बनाइसकेका छन् । तर, ती बालिकाले रश्मिकाको नृत्य शैली आफ्नै अन्दाजमा टिपेकी छन्, जुन रोचक लाग्छ । त्यसैले पनि उनले नाचेको भिडियो सर्वाधिक रुचाइएको छ ।
ती बालिकाको नाम बारिसा क्षेत्री हो । उनी हेटौंडाको रसल एकेडेमीकी छात्रा हुन् । उनी अहिले यूकेजीमा अध्ययन गरिरहेकी छिन् । विद्यालयमा हरेक शुक्रबार हुने अतिरिक्त क्रियाकलापका क्रममा उनले यो गीतमा नृत्य गरेकी थिइन् । उनको नृत्यले रश्मिकालाई समेत मोहित बनाएको छ ।