चलचित्र ‘ऐना झ्यालको पुतली’ निर्देशक सुजित बिडारीले सुर्खेतमा चलचित्रकर्मीलाई मास्टरक्लास दिने भएका छन् । सुजितले ११ औँ संस्करणको नेपाल युरोपियन फिल्म महोत्सवमा अन्तिम दिन चलचित्र मेकिङ सम्बन्धी क्लास दिने भएका हुन् ।
नेपाल युरोपियन फिल्म फेस्टिभलको ११औँ संस्करण यो पटक काठमाडौँसँगै पहिलोपल्ट सुर्खेतमा पनि हुँदैछ । सुर्खेतको मध्यपश्चिम विश्व विद्यालयको हलमा चार दिन चल्ने फिल्म महोत्सवमा ५ युरोपियन र ३ नेपाली फिल्म प्रदर्शन हुनेछन् । यसरी प्रदर्शन हुने ३ नेपाली फिल्ममा सुजित बिडारी लिखित तथा निर्देशित ‘ऐना झ्यालको पुतली’ पनि रहेको छ । महोत्सव कात्तिक १९ गते सुरु भएर २२ गते सकिनेछ ।
मास्टरक्लासमा आफ्नो अनुभव बाँड्न उत्साहित सुजितले महोत्सवको अन्तिम दिन फिल्ममेकिङ सम्बन्धी आफ्नो ज्ञान बाँड्नेछन् । सुजितले कात्तिक २२ गतेको पहिलो प्रहरमा नै चलचित्र बनाउन चाहिने कथादेखि त्यसलाई खिच्ने तरिकासम्मको बारेमा छलफल गर्ने जानकारी गराए । उनले भने, ‘मास्टरक्लासमा मैले चलचित्र बनाउन चाहिने आइडियादेखि त्यो आइडियालाई कथा हुँदै पटकथामा रुपान्तरण गर्ने र अन्त्यमा त्यसलाई दृश्यमा रुपान्तरण गर्ने प्रक्रियाको बारेमा आफ्नो अनुभव बाँड्नेछु ।’
अस्कर कलेजबाट फिल्म मेकिङमा स्नातक सुजितले मास्टरक्लासको दौरानमा सर्ट चलचित्र देखाउँदै अन्तक्र्रिया अगाडि बढाउने बताएका छन् । यो दौरानमा सुजितले आफू स्वयम् निर्देशित ‘सावित्री’सँगै विश्व प्रसिद्ध सर्ट फिल्म पनि देखाउने जानकारी गराए । नेपाल युरोपियन फिल्म महोत्सवको ११औँ संस्करण काठमाडौँमा भने कात्तिक ११ देखि १५ गतेसम्म चलचित्र विकास बोर्डको हलमा हुँदैछ ।