आगामी पुष २९ गतेबाट प्रदर्शनमा आउन लागेको निर्माता रमेश एमके पौडेलको डेब्यू निर्देशित चलचित्र ‘तिम्रो मेरो साथ’ले टिकटक भिडियो प्रतियोगिता आह्वान गरेको छ । तिहारमा रिलिज भएको चलचित्रमा समावेश ‘रुमालै बाटेर टाई बनाम’ बोलको गीतमा टिकटक भिडियो प्रतियोगिता घोषणा गरिएको हो ।
यो प्रतियोगितामा भाग लिन चाहनेले आफ्नो टिकटक एकाउन्टमा भिडियो अपलोड गर्दा ह्यासट्यागमा गीतको बोल, चलचित्रको नाम र निर्देशकको नाममा लेख्नुपर्नेछ । यसको नतिजा पुष २६ गते घोषणा हुने बताइएको छ । यो नियम चलचित्रका अन्य दुई गीत सार्वजनिक भएपछि पनि लागू हुनेछ । प्रतियोगितामा उत्कृष्ट हुनेलाई २५ हजार नगद र तीनवटा प्रिमियरको पास प्रदान गरिनेछ ।
यूट्युब रिलिजको १२ दिनमा ११ लाखभन्दा बढी भ्यूज बटुलिसकेको ‘रुमालै बाटेर टाई बनाम’ गीतमा सुभाष भुसालको संगीत छ भने वि पाण्डेको शब्द रचना छ । गीतमा मेलिना राई र जगदिश समालको स्वर रहेको छ । आकर्षक सेट बनाएर खिचिएको गीतको भिडियोमा चलचित्रका मुख्य कलाकारहरु पुष्प खड्का, साम्राज्ञी आरएल शाह र सन्दिप क्षेत्री प्रस्तुत छन् ।
चलचित्रमा इमिली लामा, सरोज खनाल, दिपिशा केसी, खड्क बहादुर पुन (खबपु) लगायतको पनि अभिनय छ । चलचित्रलाई सबिर श्रेष्ठ तथा बाबुराम निरौलाले लेखेका हुन् । आर्यन फिल्मस् र बोधी एचडिको ब्यानरमा निर्मित यस चलचित्रको कार्यकारी निर्मातामा सविर श्रेष्ठ, निर्मातामा पासाङ लामा छन् भने सह-निर्माता निरू भण्डारी, अशोक पोखरेल, सुमन पौडेल र सुधिर पराजुली हुन् ।