अहिलेका चर्चित गायक प्रकाश दूतराजले आत्महत्याको प्रयास गरेको खबर बाहिरिएको छ । सांगीतिक कार्यक्रमको शिलशिलामा अष्ट्रेलियामा रहेका उनले त्यहीँ स्थानीय समयअनुसार हिजो राति २ बजे झुण्डिने प्रयास गरेको नेपाल प्रेसले समाचारमा उल्लेख गरेको छ ।
उनी गायिका भूमिका गिरीसहित कन्सर्टका लागि गत २० अक्टोबरमा अष्ट्रेलिया उडेका थिए । त्यहाँ दुवैलाई बस्नका लागि आयोजक कमिटीले एउटा फ्याट उपलब्ध गराएको थियो । सोही फ्ल्याटको आफू सुत्ने कोठामा दूतराजले झुण्डिने प्रयास गरेको बताइएको छ ।
उनको कोठाका ढोका खुल्लै रहेकोले दूतराजले झुण्डिने प्रयास गरेको देखेपछि गायिका भूमिकाले कोठामा प्रवेश गरेर उद्दार गरेकी थिइन् । उनको अहिले स्वास्थ्य अवस्था राम्रो रहेको जानकारी प्राप्त छ । तर, उनले आत्महत्याको प्रयास गर्नुको कारण खुलेको छैन । उनका ‘घर कता हो बैनीको’, ‘जाम भो माइली’, ‘चोली मैलै भो’, ‘रेलिमाई’ लगायतका गीत चर्चित छन् ।