दुई दशकअघिको लोकप्रिय गीत ‘कालो चस्मा लाऊ है मैयाँ’लाई रिमेक गरेर निर्देशक दीपक श्रेष्ठले आफ्नो नयाँ चलचित्र ‘पर्खि बसें तिमीलाई’मा समावेश गरेका छन् । शुक्रबार उक्त गीत सार्वजनिक गर्दै आगामी पुष २७ गतेलाई चलचित्रको प्रदर्शन मिति समेत घोषणा गरिएको छ ।
गीतमा सुरेन्द्र राणाको शब्द र शम्भुजित बाँस्कोटाको संगीत छ भने प्रमोद खरेल र मिलन नेवारले स्वर छ । निशा रसाइलीको कोरियोग्राफी रहेको गीतमा अभिनेता किरण श्रेष्ठ र अभिनेत्री रक्षा बुढाथोकी फिचर्ड छन् । यो उनीहरुको डेब्यू चलचित्र हो । निर्देशक श्रेष्ठले किरण र रक्षामा क्षमता देखेपछि डेब्यू गराएको बताएका छन् ।
निर्देशक श्रेष्ठ भन्छन्, ‘यो विशुद्ध प्रेमकथामा बनेको चलचित्र हो । त्यसैले यसको सुरुवात गीतमार्फत् गरेका छौँ । मैले निर्देशन गरेको ‘पर्खि बसेँ’मा झैँ यसमा पनि नयाँ कलाकारलाई लिएर काम गरेको छु । उहाँहरुलाई चलचित्र उद्योगले स्वागत गर्नेमा विश्वस्त छु ।’
शिव श्रेष्ठ, अनिशा रसाइली, विल्सन विक्रम राई, मनिष श्रेष्ठ आदिको पनि अभिनय रहेको चलचित्रमा राजाराम बुढाथोकीको निर्माण, कोमल गुरुङको सह-निर्माण, परिच्छेद सेन, मौनता श्रेष्ठ र पुरुषोत्तम ढुंगेलको लेखन, शम्भुजितसँगै दीपक शर्मा, महेश खड्का र बाबुल गिरीको संगीत, संकल्प भुजेलको छायांकन, भुपेन्द्र अधिकारीको सम्पादन, निशासँगै रामजी लामिछानेको नृत्य निर्देशन छ ।
चलचित्रलाई काठमाडौँमा रिच इन्टरटेनमेन्ट र मोफसलमा एफडी कम्पनीले वितरण गर्दैछन् । रोमन फिल्मस् र तपश्री प्रोडक्सन (सिक्किम)को निर्माण रहेको चलचित्रलाई नेपाल र सिक्किममा खिचिएको हो । चलचित्रमा अहिलेको पुस्ताको प्रेमकथा रहेको निर्देशक श्रेष्ठले बताएका छन् ।