काठमाडौं – सन् २०२० को चर्चित रियालिटी शो ‘अमेरिकन आइडल’ को १८औँ सिजनका फाइनलिस्ट अर्थर गन (दिवेश पोखरेल) ले आगामी नोभेम्बर महिनामा नेपालमा आफ्नो सांगीतिक प्रस्तुति दिने भएका छन्। उनले आफ्नो आधिकारिक इन्स्टाग्राम अकाउन्टमार्फत ‘लाइभ इन नेपाल’ नामक कन्सर्टका लागि नेपाल आउन लागेको औपचारिक घोषणा गरेका हुन्। यस सुखद घोषणासँगै उनका नेपाली प्रशंसकहरू निकै उत्साहित बनेका छन्। आफ्नो पोस्टमा अर्थरले नोभेम्बरमा नेपाल आउने पक्का भएको तर कन्सर्टको निश्चित मिति र स्थान भने चाँडै नै सार्वजनिक गरिने जानकारी दिँदै कार्यक्रम बुकिङका लागि इमेल गर्न आयोजकहरूलाई आह्वानसमेत गरेका छन्।
अमेरिकन आइडलमा आफ्नो जादुयी स्वर र पृथक् शैली प्रस्तुत गरेपछि विश्वभर लोकप्रियताको शिखरमा पुगेका अर्थरलाई उक्त कार्यक्रमकी निर्णायक तथा प्रख्यात अमेरिकी गायिका केटी पेरीले ‘हि इज द बेस्ट’ भन्दै खुलेर प्रशंसा गरेकी थिइन्। विश्व मञ्चमा नेपालको नाम चिनाउन सफल अर्थरले यसअघि वि.सं. २०७९ सालको साउन अन्तिम साता ‘टुबोर्ग होम कमिङ अर्थर गन’ अभियानअन्तर्गत नेपालका सातवटा प्रमुख सहरहरूमा आफ्नो भव्य सांगीतिक कन्सर्ट सम्पन्न गरिसकेका छन्। उनको यो आगामी सांगीतिक भ्रमणलाई लिएर दर्शक तथा श्रोताहरूमा फेरि त्यस्तै उल्लासमय माहोलको अपेक्षा गरिएको छ।