काठमाडौँ।
बलिउडका ‘वान्टेड’, ‘धूम २’, ‘वेलकम’ जस्ता चर्चित चलचित्रका कलाकार ह्यारी जोश नेपाल आएका छन् । उनी नेपाली चलचित्र ‘देव वाणी’मा अभिनय गर्न बुधवार काठमाडौँ ओर्लिएका हुन् ।
बिहीबार बिहानदेखि बालाजु ल्याबमा जोशको भागको छायाङ्कन भइरहेको चलचित्रका निर्देशक बाबु साहेब बलामीले बताए । करिब ६ दिन फिल्मको अन्तिम चरणको छायाङ्कन हुनेछ ।
फिल्ममा ह्यारीको विशेष भूमिका रहने बताइएको छ । यो चलचित्र हिन्दी भाषामा पनि बनेकाले भारतीय कलाकारलाई अभिनय गराएको बलामीले जनाए ।
एक्सन-लभ स्टोरी कथामा बनेको चलचित्रमा कुन्दन भारद्वाज, अनुजा लेप्चा, सुनिल थापा, ध्रुव कोइराला, घनश्याम गिरी, रवीन्द्र झा, नन्दु श्रीवास्तव, मौसम पौडेल, प्रदीप ढकाल, लक्ष्मीनाथ तिमल्सिनाको पनि अभिनय रहेको छ । मिना खड्का र हिराबहादुर लेप्चा निर्माता हुन् ।