काठमाडौँ।
दिनेश राउतले निर्देशन गर्ने चलचित्र ‘पूजार सार्की’मा अभिनेता पल शाह भित्रिएका छन् । यसअघि सो चलचित्रको लागि अभिनेता द्वय आर्यन सिग्देल र प्रदीप खड्का अनुबन्ध रहिसकेका छन् ।
दर्शकको रोजाइका तीन स्टारहरू एकसाथ चलचित्रमा आउँदा यसले दर्शकमा छोड्ने छाप पनि स्मरणीय हुने अपेक्षा गरिएको छ । हालसम्म दर्शकलाई निराश नबनाएका निर्देशक राउत यस चलचित्रलाई विषयगत र व्यापारिक दुवै दृष्टिकोणबाट ब्लकबस्टर बनाउने दाउमा छन् । माघ पहिलो हप्ताबाट छायाङ्कन सुरु हुने यसको अभिनेत्री भने सार्वजनिक गरिएको छैन ।
विकास सुवेदीले लेखेको यो चलचित्रलाई सङ्गीतकार सुभाष भुसालको बनाउँदै छन् । एक दर्जन चलचित्रमा सङ्गीत दिएका भुसालले पहिलो पटक चलचित्र निर्माण गर्न लागेका हुन्।
भुसालले सङ्गीत गरेको सुपर हिट गीत ‘लै लै’ र ‘बनकी चरी’ दिनेशले निर्देशन गरेको चलचित्र ‘प्रसाद’मा समावेश थिए भने अर्को सुपर हिट गीत ‘जिन्दगीको के छ र भर’ दिनेशकै चलचित्र ‘सेल्फी किङ्ग’मा समावेश थियो।
‘पूजार सार्की‘ किङ्गडम नेटवर्कको ब्यानरमा बन्नेछ भने आरआर फिल्मसले वितरण गर्नेछ।