काठमाडौँ। चलचित्र ‘गाउँ नै रमाइलो’मा अभिनेत्री मिरूना मगर भित्रिएकी छन् । हिमाल कडरियाले निर्माण गर्न लागेको चलचित्रमा मिरूनालाई प्रमुख भूमिकामा अनुबन्ध गराइएको हो । निर्माण पक्षका अनुसार मिरूनासँग कागजी सम्झौता भइसकेको छ ।
मिरूनासँगै यस चलचित्रमा कलाकार बुद्धि तामाङ पनि अनुबन्ध भएका छन् । यसअघि यो चलचित्रमा अभिनेता द्वय आर्यन सिग्देल र दयाहाङ राईले काम गर्ने तय भइसकेको छ ।
यस चलचित्रमा मिरुना कसको जोडीको रूपमा देखिन लागेकी हुन् भन्ने खुलाइएको छैन । चलचित्रको विषयवस्तुबारे अहिले नै खुलासा नगर्ने यसका निर्देशक दिनेश राउतले बताए । यद्यपि यो चलचित्रले गाउँको रोचक कथालाई प्रस्तुत गर्नेछ । राउतले दर्शकको अनुमान विपरीतको भूमिकामा मिरूनाको अभिनय रहने दाबी गरे ।
दिनेशले चलचित्र ‘पुजार सार्की’पछि यो चलचित्रको निर्देशन थाल्नेछन् । यो चलचित्र आउँदो वर्षको दसैँमा रिलिज गर्ने लक्ष्य राखिएको छ ।
चलचित्र ‘गाउँ नै रमाइलो’लाई नेपालमा आरआर फिल्मस्ले वितरण गर्नेछ । ओभरसिजमा भने यो चलचित्रलाई एमएसएम इन्टरटेन्मेन्टले वितरण गर्नेछ ।