काठमाडौँ। सौरभ चौधरीद्वारा निर्देशित चलचित्र ‘अगस्त्य’रिलिज भएको छ। देशभर उच्च शो सहित रिलिज भएको यो चलचित्र विदेशमा पनि रिलिज भएको छ।
रिलिजको पूर्व सन्ध्यामा बिहीबार साँझ चलचित्रको युनिट सहित चलचित्रकर्मी, पत्रकार र शुभेच्छुकहरूको उपस्थितिमा प्रिमियर आयोजना भएको थियो। प्रिमियर चलचित्रले सुखद प्रतिक्रिया पाएको छ।
नेपालको तराई क्षेत्र र भारतको गोरखपुरमा छायाङ्कन भएको चलचित्रमा अभिनेता सौगात मल्ल एक्सन अवतार र मानसिक सन्तुलन गुमेको चरित्रमा प्रस्तुत छन् । दर्शकलाई हलमा आकर्षित गर्ने यही ठुलो आधार मानिएको छ । नेपालमा बढ्दो मानव अङ्ग तस्करीको कथालाई मियो बनाएर फिल्मले एक्सन, प्रेम र मित्रतालाई देखाएको छ ।
‘अगस्त्य’मार्फत दोस्रो च्याप्टरको पनि निर्माण घोषणा गरिएको छ । जसलाई २०२६ मा प्रदर्शन गर्ने जनाइएको छ ।
निर्देशक चौधरीले नै लेखेको चलचित्रमा सौगातसँगै नाजिर हुसेन, मलिका महत, विजय बराल, रवीन्द्र झा, शिशिर वाङ्गदेल, बेन बस्नेत लगायतको अभिनय छ । निश्चल बस्नेत केमियो भूमिकामा छन् ।
प्रकाश मल्ल, अनिष तामाङ र विनोद पौडेल निर्मातामा छन् भने कार्यकारी निर्माता विश्व गौचन र अभिषेक चौधरी हुन् । ‘अगस्त्य’का छायाकार सञ्जय लामा हुन् ।