काठमाडौं। भारतका प्रसिद्ध कमेडीयन कलाकार कपिल शर्माले नेपाली चलचित्र ‘बद्री बहादुर’लाई सफलताको शुभकामना दिएका छन् । बिहीबार सार्वजनिक ट्रेलरको सुरुवातमा नै शर्माको शुभकामना राखिएको छ ।
यो चलचित्रका निर्देशक शोभित बस्नेतले शर्माको शुभकामनालाई प्रचारको माध्यम बनाएका छन् । कपिलले शुभकामना दिँदै चलचित्रका निर्देशक बस्नेतले नै सो भिडियो छायाङ्कन गरिरहेको बताएका छन् ।
केही दिनअघि बस्नेतले शर्मालाई भेटेको फोटो सोसल मिडियामा शेयर गरेका थिए । उनले केही समय अगाडी मुम्बई गएको बेला कपिललाई भेटेको बताइएको छ । बस्नेतले कपिलले सञ्चालन गर्ने चर्चित शो ‘द कपिल शर्मा शो’को सेटमा बसेको फोटो पनि शेयर गर्दै उनले ‘बद्री बहादुर’लाई कपिलले प्रचारमा सहयोग गर्ने वचन दिएको बताएका थिए ।
भारतका चलचित्रहरू प्रचारको लागि कपिलको शो ‘द कपिल शर्मा शो’ आकर्षक प्लेटफर्म मानिन्छ । भारतका प्रायः सुपरस्टारहरू उनको कार्यक्रममा पुगेका छन् ।
‘बद्री बहादुर’ चैत्र २३ गते रिलिज हुँदैछ ।
हेर्नुहोस् ट्रेलरमा समावेश कपिल शर्माको शुभकामना सन्देश: