काठमाडौं – प्रधानमन्त्री केपी शर्मा ओलीले बनेपामा निर्माण हुन लागेको ‘सिनेपाः’ नामक इनडोर फिल्म छायाङ्कन स्टुडियोको निर्माण कार्य सुरु भएको घोषणा गरेका छन् । मङ्गलवार प्रधानमन्त्री निवास बालुवाटारमा आयोजित एक समारोहमा उनले ३९ करोड रुपैयाँको लागतमा निर्माण हुन लागेको उक्त स्टुडियो घोषणा गरेका हुन् ।
प्रधानमन्त्री ओलीले स्टुडियो निर्माणमा सरकारको पूर्ण सहयोग रहने स्पष्ट गर्दै यस दिनलाई नेपाली सिने क्षेत्रको युग परिवर्तनको सुरुआतको रूपमा लिन सकिने बताए । साथै, उनले स्टुडियोमा सिनेमा छायाङ्कनसँगै डबिङ र गायन स्टुडियो पनि समावेश गर्न सुझाव दिए ।
४१ रोपनी क्षेत्रफलमा बन्ने सो स्टुडियो बनेपा नगरपालिका वडा नं. १० र १३ मा अवस्थित प्राकृतिक रमणीय स्थानमा निर्माण गरिनेछ । प्रधानमन्त्री ओलीले यसअघि पालुङटार र दोलखा लगायत स्थानमा स्टुडियो वा फिल्म नगरी बनाउने प्रस्ताव राखेको तर कार्यान्वयनमा नआएको स्मरण गरे ।
समारोहमा सञ्चार तथा सूचना प्रविधि मन्त्री पृथ्वीसुब्बा गुरुङले सन् २०२६ भित्र सम्पन्न गर्ने लक्ष्य राखिएको यो स्टुडियो निर्माणमा सरकारको पूर्ण सहयोग रहने जानकारी दिँदै चलचित्र ऐन, मिडिया काउन्सिल विधेयक र सामाजिक सञ्जाल विधेयक संसद्मा पुगेको बताए । पूर्वसञ्चारमन्त्री गोकुल बास्कोटाले स्टुडियोका लागि जग्गा उपलब्ध गराउने जनप्रतिनिधिहरूलाई धन्यवाद दिए ।
वरिष्ठ चलचित्र निर्देशक तथा कलाकार नीर शाहले स्टुडियोमा कृत्रिम बुद्धिमत्ता (एआई) र अत्याधुनिक प्रविधि समावेश गर्न सुझाव दिए भने २०२६ सालको चलचित्र ऐनले अहिलेको समयअनुसार फिल्मलाई स्पष्ट परिभाषित गर्न नसकेको टिप्पणी गरे ।
चलचित्र विकास बोर्डका अध्यक्ष दिनेश डिसीले रियल टाइम बक्स अफिस प्रणाली आगामी साताबाट सुरु हुने जानकारी दिए ।