नीर शाह ‘परान’को पोस्टरमा, भूमिकाबारे विभिन्न अड्कलबाजी

काठमाडौं – दीपकप्रसाद आचार्य ‘काकु’ निर्देशित नेपाली कथानक चलचित्र ‘परान’ को नयाँ पोस्टर सार्वजनिक भएको छ। सोमबार सार्वजनिक गरिएको पोस्टरमा वरिष्ठ अभिनेता नीर शाह प्रमुख रूपमा प्रस्तुत भएका छन्। यसअघि महेश त्रिपाठी र अञ्जना बराइलीलाई समावेश गरिएको पोस्टर आएकोमा, यस पटक भने नीर शाहलाई मात्रै केन्द्रमा राखिएको छ।

पोस्टरमा नीर शाहले सङ्ख फुक्दै गरेको दृश्य देख्न सकिन्छ। यो दृश्यले चलचित्रको कथामा धर्म, संस्कृति वा कुनै परम्परागत अनुष्ठानको महत्त्वपूर्ण भूमिका हुन सक्ने सङ्केत गर्दछ। यस पोस्टरले नीर शाहको भूमिका र चलचित्रको कथावस्तुबारे विभिन्न अड्कलबाजीहरूलाई जन्माएको छ, यद्यपि निर्माण पक्षले भने कथाबारे कुनै जानकारी दिएको छैन।

चलचित्रको ट्याग लाइन ‘सासले होइन, साथले चल्ने’ रहेको छ, जसले चलचित्रको मूल सन्देश सम्बन्धहरूको गहिराई र एक अर्काको साथको महत्त्वमा केन्द्रित रहेको अनुमान गर्न सकिन्छ। नीर शाह जस्ता अनुभवी कलाकारको केन्द्रीय भूमिकाले यो चलचित्र एक सशक्त कथा र उत्कृष्ट अभिनयको सङ्गम हुने अपेक्षा गरिएको छ।

गोल्छा समूह र प्रिज्मा समूहको साझेदारीमा रहेको बाइस्कोप सिनेमा प्रालिले यो चलचित्र निर्माण गरेको हो। बाइस्कोप सिनेमाको पहिलो प्रोजेक्टको रूपमा यसको निर्माण भएको प्रबन्ध निर्देशक रञ्जित आचार्यले जानकारी दिएका छन्। चलचित्रको कथा दीपक आचार्यले नै तयार पारेका हुन् भने पटकथा र संवाद यम थापाले लेखेका हुन्।

चलचित्रमा नीर शाह, महेश त्रिपाठी, अञ्जना बराइली, मदनकृष्ण श्रेष्ठ, पूजा चन्द, केकी अधिकारी, प्रवीण खतिवडा, बुद्धि तामाङ, यासेली योङहाङ, बबिन राई, पुष्पराज ओझा, सीमा काफ्ले, दमन रुपाखेती, यमन श्रेष्ठ, सुब्रतराज आचार्य, सुरेश थापा, विनोद राई र बाल कलाकार आर्यादीप आचार्य लगायतका कलाकारहरूको अभिनय रहेको छ।