‘मन बिनाको धन’लाई वृद्धदेखि जेनजीसम्मको साथ

काठमाडौं – गत शुक्रवारदेखि प्रदर्शनमा आएको नेपाली कथानक चलचित्र ‘मन बिनाको धन’ले दर्शकहरूको पुस्तान्तरणकारी साथ पाएको छ। प्रदर्शनको पहिलो दिनदेखि नै हलहरूमा युवा पुस्ता (जेनजी) देखि लिएर ज्येष्ठ नागरिकहरूको बाक्लो उपस्थिति देखिएको छ। चलचित्रले दर्शकहरूमा देखिएको उत्साहको एउटा विशिष्ट उदाहरणका रूपमा सोमबार काठमाडौंस्थित एक सिनेमा हलमा ७६ बर्सिया वृद्धाले चलचित्र हेर्दै भावुक हुँदै चलचित्रको गीतसमेत गुनगुनाएकी थिइन्।

चलचित्रले सप्ताहान्त पछि पनि कामकाजी दिनहरूमा देशभरका उपलब्ध प्रदर्शनहरूमा उल्लेखनीय अकुपेन्सी कायम गरिरहेको छ। दर्शकहरूको यो बलियो मागका कारण देशभरका सिनेमा हलहरूले ‘मन बिनाको धन’को प्रदर्शन सङ्ख्या (शो) बढाउन थालेका छन्। विशेष गरी मङ्गलवार (चलचित्रको प्रदर्शनको पाँचौँ दिन) धेरै हलहरूमा टिकट दरमा भारी छुट (आधा मूल्य) दिइएकाले काठमाडौं उपत्यकासहित नेपालगन्ज, इटहरी, बिर्तामोड, दमक, चितवन, पोखरा, दाङ, धनगढी लगायतका प्रमुख सहरहरूमा दर्शकको उपस्थिति थप प्रभावशाली देखिएको छ।

गायक अशोक दर्जीको वास्तविक जीवनको सङ्घर्षपूर्ण कथालाई पर्दामा उतारेको ‘मन बिनाको धन’ले समीक्षक तथा दर्शकहरूबाट सकारात्मक प्रतिक्रिया बटुलिरहेको छ। चलचित्रको भावनात्मक कथावस्तु, सङ्गीत पक्ष र प्रस्तुतिको प्रशंसा भइरहेको छ।

बाल गायकबाट चर्चित बनेका अशोक दर्जीको यस चलचित्रमा गरिएको स्वाभाविक र हृदयस्पर्शी अभिनयले दर्शकहरूलाई निकै भावुक बनाएको छ। धेरै दर्शकहरूले अशोकमा भविष्यमा एक सफल कलाकार बन्न सक्ने प्रबल सम्भावना देखेको प्रतिक्रिया दिएका छन्।

‘कथा जिरोदेखि हिरोसम्म’ भन्ने ट्याग लाइनसहित निर्माण भएको यस चलचित्रलाई सङ्गीतकारको परिचय बनाएका टङ्क बुढाथोकीले निर्देशन गरेका हुन्। चलचित्रमा अशोक दर्जीसँगै वरिष्ठ कलाकार सन्तोष पन्त, रमा थपलिया, सरोज खनाल, निता ढुङ्गाना, रमेश विश्वकर्मा, भोला सापकोटा, बुद्धि तामाङ, रवीन्द्र झा, उत्सव सापकोटा, एआर बुढाथोकी लगायतका कलाकारहरूको अभिनय रहेको छ।