काठमाडौं – स्वदेशी चलचित्र निर्माणमा पछिल्ला वर्षहरूमा देखिएको उत्साहजनक वृद्धि यस आर्थिक वर्षमा झन् प्रभावशाली बनेको छ। आर्थिक वर्ष २०८२/८३ को पहिलो चौमासिक (साउन, भदौ, असोज, कार्तिक) मै ७० चलचित्रले निर्माण इजाजत लिएर नयाँ रेकर्ड कायम गरेका हुन्।
चलचित्र विकास बोर्डले सार्वजनिक गरेको यो तथ्याङ्कका अनुसार यसअघि कुनै पनि वर्षको पहिलो चौमासिकमा यति धेरै चलचित्र दर्ता भएको इतिहास छैन। यसले नेपाली चलचित्र उद्योगमा नयाँ ऊर्जाको प्रवाह, सृजनशीलता र लगानी आकर्षणमा वृद्धि भएको सङ्केत गर्दछ।
बोर्डका अनुसार पछिल्लो पाँच वर्षको पहिलो चौमासिकमा चलचित्र निर्माण इजाजत सङ्ख्या यो प्रकार छ:
• २०७८/७९ — ३६ चलचित्र
• २०७९/८० — ४७ चलचित्र
• २०८०/८१ — ४७ चलचित्र
• २०८१/८२ — ५१ चलचित्र
• २०८२/८३ — ७० चलचित्र
यी तथ्याङ्कले देखाउँछन् कि नेपाली चलचित्र उद्योग निरन्तर उकालो यात्रामा छ र फिल्म निर्माणमा रहेको सम्भावना पनि क्रमशः विस्तार हुँदै गएको छ।