काठमाडौं – मङ्गलवार आयोजित एक विशेष समारोहबीच नेपाली चलचित्र ‘मिरमिरे’को ट्रेलर सार्वजनिक गरिएको छ। सार्वजनिक झलकले दर्शकलाई एउटा वियोगान्त र भावनात्मक पारिवारिक यात्राको सङ्केत दिएको छ, जहाँ एउटा घरभित्र आमा र श्रीमतीको रिक्तताले निम्त्याएको शून्यतालाई मुख्य विषयवस्तु बनाइएको छ।
यम शेर्पाको लेखन तथा निर्देशनमा तयार भएको यस चलचित्रको ट्रेलरले विशेष गरी पिता र पुत्रीबीचको प्रगाढ सम्बन्धलाई केन्द्रमा राखेको छ। जीवन सङ्गिनीको अभावमा एक्लो परेका बुवा र आमाको ममताका लागि तड्पिरहेकी छोरीको मर्मस्पर्शी कथालाई ट्रेलरमा कलात्मक ढङ्गले प्रस्तुत गरिएको छ। एउटी आमाको अनुपस्थितिमा एउटा पुरुषले सन्तानको हेरचाह र हुर्काइमा भोग्नुपर्ने सकस र छोराछोरीको जीवनमा आमाको अपरिहार्यतालाई चलचित्रले सूक्ष्म रूपमा केलाएको देखिन्छ।
ट्रेलरको अर्को सशक्त पक्ष यसमा समेटिएको त्रिकोणात्मक प्रेमकथा हो। अभिनेता दयाहाङ राई, प्रकाश सपूत र अभिनेत्री सिर्जना निङलेखुबीचको सम्बन्धका उतारचढावलाई ट्रेलरमा देख्न सकिन्छ। आफ्नी सानी छोरीलाई आमाको अभाव महसुस हुन नदिन दयाहाङले गर्ने सङ्घर्ष र मातृत्व प्रदान गर्ने उनको प्रयासले दर्शकलाई भावुक बनाउने निश्चित छ। साथै, आमाको वास्तविकता पत्ता लगाउन छोरीले गर्ने सङ्घर्ष र सत्य थाहा पाएपछिको उसको प्रतिक्रियालाई ट्रेलरमा कौतुहलतापूर्वक प्रस्तुत गरिएको छ।
आगामी माघ १ गतेबाट प्रदर्शनको तयारीमा रहेको यो चलचित्रमा दयाहाङ, प्रकाश र सिर्जनाका साथै शाइसा गौचन, माओत्से गुरुङ, छुल्ठिम गुरुङ, भोलाराज सापकोटा लगायतका कलाकारहरूको सशक्त अभिनय रहेको छ। यार्सा फिल्मसको प्रस्तुतिमा निर्माण भएको यस चलचित्रलाई निमु शेर्पा, छोङ्बा लामा शेर्पा र आङछिरिङ शेर्पाले निर्माण गरेका हुन् भने रोहित कट्टेल यसका कार्यकारी निर्माता हुन्। गोविन्द बोहरा र सुदीप कुँवर सह-निर्माताको रूपमा रहेका छन्।
ट्रेलर: