काठमाडौं – नेपाली चलचित्र जगतमा पौराणिक पृष्ठभूमि र आधुनिक रहस्यको फ्युजन मानिएको चलचित्र ‘शिवांश: च्याप्टर १’ को आधिकारिक ट्रेलर सार्वजनिक भएको छ। अञ्जन सिनेमा प्रोडक्शनको प्रस्तुतिमा निर्माण भएको यो चलचित्रले महाशिवरात्रिको पावन अवसर पारेर आगामी फागुन १ गतेदेखि देशभरका सिनेमाघरमा प्रदर्शन हुने तयारी गरिरहेको छ। सार्वजनिक ट्रेलरले एकातिर आध्यात्मिक आस्थाको पाटोलाई उधिनेको छ भने अर्कोतिर साधुको आवरणमा लुकेको भयावह अपराध र क्रूरतालाई मुख्य विषयवस्तु बनाएको सङ्केत गरेको छ।
ट्रेलरको प्रारम्भमै अभिनेता प्रवीण खतिवडा एक रहस्यमयी र शक्तिखोर साधुका रूपमा देखिएका छन्। शरीरभरि खरानी, हातमा त्रिशूल र आँखामा एउटा अनौठो उन्माद बोकेका खतिवडाको लुक्सले दर्शकलाई रोमाञ्चित बनाउँछ। उनी कुनै दिव्य ‘सिद्धि’ वा अलौकिक शक्ति प्राप्तिका लागि जेसुकै गर्न तयार रहेको एउटा सशक्त ‘एन्टी-हिरो’ पात्रका रूपमा देखिएका छन्। जोगीको सादगी जीवन र त्यागको आवरणभित्र लुकेको आपराधिक मानसिकता र जघन्य हत्यासम्मका शृङ्खलाहरूलाई ट्रेलरमा प्रभावशाली ढङ्गले उतारिएको छ।
यो चलचित्रले पौराणिक समुद्र मन्थनको प्रसङ्ग र त्यति बेला निस्किएको कालकुट विषको कथालाई वर्तमान समयको रहस्यसँग जोड्ने प्रयत्न गरेको छ। विशेष गरी एउटा दिव्य शिला (ढुङ्गा) को खोजी र त्यसले कलियुगमा निम्त्याउन सक्ने शक्ति वा विनाशको वरिपरि कथा घुमेको देखिन्छ। ट्रेलरमा सुनिएको “यो पुस्तकले विध्वंस निम्त्याउन सक्छ” भन्ने संवादले चलचित्रमा लुकेको गम्भीर खतरा र रहस्यलाई थप प्रस्ट पारेको छ। तान्त्रिक विधि, मन्त्रोच्चारण र गुफाका दृश्यसँगै ल्यापटप, आधुनिक हातहतियार र प्रहरी अनुसन्धानलाई सँगै देखाएर निर्देशक सन्तोष कुमार आत्रेयले आध्यात्मिक र आधुनिक युगको द्वन्द्वलाई स्तरीय भीएफएक्स र छायाङ्कनमार्फत प्रस्तुत गरेका छन्।
चलचित्रको अर्को आकर्षण भारतीय चर्चित गायक कैलाश खेरको स्वर र सङ्गीत हो, जसले ट्रेलरलाई अझ ओजिलो र आध्यात्मिक बनाएको छ। साथै, न्ह्यू बज्राचार्य र राजनराज सिवाकोटीको सङ्गीत, मिलन नेवार र समीक्षा अधिकारीको स्वरले फिल्मको साङ्गीतिक पक्षलाई मजबुत बनाएका छन्। तेज गिरी, विकास जोशी, रुशा न्यौपाने लगायतका कलाकारको अभिनयले कथालाई थप रहस्यमयी बनाएको छ। अञ्जान केसीको कथा र निर्माता रहेको यस चलचित्रमा बारत लिम्बूको स्क्रिनप्ले र बनिश शाहको सम्पादन रहेको छ।
नेपाली सिनेमा बजारमा विरलै बन्ने ‘स्पिरिचुअल एक्सन ड्रामा’ जनरामा निर्माण भएको यो चलचित्रले दर्शकलाई नयाँपनको स्वाद दिने अपेक्षा गरिएको छ।
ट्रेलर: