काठमाडौं – कलाकार निखिल उप्रेती र वर्षा सिवाकोटी अभिनीत चलचित्र ‘कस्तुरी’को छायाङ्कन कार्य प्रारम्भ भएको छ। मङ्गलवार बिहान ललितपुरस्थित बङ्गलामुखी मन्दिरमा शुभारम्भ समारोहको आयोजना गरी सिनेमाको प्रारम्भिक दृश्यहरू खिचिएका छन्।
चलचित्रका निर्देशक ऋत बोहोराले शुभारम्भ कार्यक्रमपछि नै फिल्मांकन सुरु गरिएको जानकारी दिएका छन्। उनका अनुसार, चलचित्रका प्रमुख दृश्यहरू काठमाडौं उपत्यका र वरिपरिका क्षेत्रमा खिचिनेछन्।
निर्देशक बोहोराले यस चलचित्रमा रहस्य, सस्पेन्स र अपराधजन्य घटनाक्रमका जटिल पक्षहरू प्रस्तुत गरिने बताएका छन्। यो पहिलो पटक हो जब निखिल उप्रेती र वर्षा सिवाकोटीले एकै चलचित्रमा काम गर्न लागेका छन्।
मुख्य कलाकारद्वयका अतिरिक्त शेखर चापागाईँ, निर्मल शर्मा, निशा अधिकारी, अर्जुन गुरुङ, भोलाराज सापकोटा, सबी थापा, प्रशान्त केसी, सन्तोष बानियाँ, सुवास बञ्जन, मिरा पण्डित, घनश्याम जोशी, श्रेया श्रेष्ठ र प्रतिष्ठा थापाले मुख्य भूमिकामा अभिनय गर्नेछन्। त्यस्तै, नेहा गौतमसँगै गौरव पहारी र हेना नगरकोटीले विशेष भूमिकामा देखा पर्नेछन्।
टेन इन्टरटेनमेन्ट प्रा.लि.को उत्पादनमा बन्न लागेको यस चलचित्रको कथा निर्देशक बोहोरा स्वयंले तयार पारेका हुन्। धिरज कुमार अग्रवालले निर्माता र अञ्जली चौधरीले सह-निर्माताको जिम्मेवारी सम्हालेकी छिन्।
चलचित्रको प्राविधिक पक्षमा छायाकारको रूपमा आलोक शुक्ला र मुख्य सह-निर्देशकको जिम्मेवारीमा ललित बिस्ट रहेका छन्। सङ्गीतका लागि प्रशान्त सिवाकोटी र निर्माण व्यवस्थापनका लागि दिलीप पन्तको योगदान रहनेछ।