काठमाडौं – देशको बदलिँदो राजनीतिक परिदृश्य र चुनावी सरगर्मीको प्रत्यक्ष प्रभाव मनोरञ्जन क्षेत्रमा पनि देखिन थालेको छ। एभरेस्ट सूर्य बोहराको निर्देशनमा तयार भएको चलचित्र ‘चमेलीको पोइ’ ले आफ्नो पूर्व निर्धारित प्रदर्शन मिति स्थगित गरेको छ। दर्शकले चैत १३ गतेका लागि क्यालेन्डरमा चिनो लगाएको यो फिल्म अब सो मितिमा प्रदर्शन नहुने पक्का भएको हो।
फिल्मका निर्माता रामनारायण उपाध्यायले एक विज्ञप्ति जारी गर्दै प्रदर्शन स्थगनको औपचारिक जानकारी गराएका हुन्। देशमा विकसित पछिल्लो राजनीतिक घटनाक्रम र निर्वाचनको माहौललाई मध्यनजर गर्दै फिल्मको प्रदर्शन रोक्ने निर्णयमा पुगेको निर्माण पक्षले जनाएको छ। निर्माता उपाध्यायले चलचित्र प्रदर्शनका लागि शान्तिपूर्ण र अनुकूल समयको अपरिहार्यता औँल्याउँदै भनेका छन्, “हामी फिल्म प्रदर्शनका लागि अझ प्रभावकारी र सहज वातावरणको पर्खाइमा छौँ, जसले गर्दा दर्शकले ढुक्क भएर फिल्म हेर्न पाउन्।” दर्शकलाई निराश नहुन आग्रह गर्दै उनले स्थिति अनुकूल हुनासाथ सञ्चारमाध्यम मार्फत नयाँ मिति घोषणा गरिने प्रतिबद्धता समेत व्यक्त गरेका छन्। साथै, तोकिएकै समयमा निर्माण कार्य सम्पन्न गरेकोमा उनले निर्देशक बोहरा लगायतको टिमलाई धन्यवाद दिएका छन्।
धनलक्ष्मी सिने मेकर्सको ब्यानरमा निर्माण भएको यो चलचित्र सामाजिक विषयवस्तुमा आधारित कमेडी जनरामा बनेको हो। यसमा नारायण त्रिपाठी, सुरक्षा पन्त, मुकुन भुसाल, विल्सन विक्रम राई र रवीन्द्र झा जस्ता कलाकारहरूको अभिनय रहेको छ। साथमा प्रेम देव गिरी, गणेश गौतम, अंशु महर्जन, बबिन राई, खड्गबहादुर पुन लगायतका कलाकारहरूको पनि यसमा महत्त्वपूर्ण भूमिका छ।