काठमाडौं – नेपाली चलचित्र ‘मितज्यू’को प्रमोसनल गीत ‘गैराघरे काइँली’ले यति बेला साङ्गीतिक बजार र दर्शकको ध्यान तान्न सफल भएको छ। युट्युबमा सार्वजनिक भएको एक साता नबित्दै यस गीतले ११ लाखभन्दा बढी पटक हेरिएको रेकर्ड बनाएको छ। फिल्मको प्रचारप्रसारको प्रारम्भिक अस्त्रकै रूपमा ल्याइएको यस गीतले छोटो समयमै पाएको यो लोभलाग्दो दर्शक साथले निर्माण टोलीलाई निकै उत्साहित बनाएको छ।
गीतको सफलताबाट हौसिएका चलचित्रका निर्माता जनक घर्ती मगरले दर्शकप्रति आभार प्रकट गरेका छन्। युट्युबमा ६ दिनमै १० लाख भ्युज पार गरेको सन्दर्भलाई जोड्दै उनले फिल्मप्रति दर्शकले देखाएको अगाध मायाका लागि सम्पूर्णलाई धन्यवाद ज्ञापन गरेका हुन्। भिडियोमा चलचित्रका मुख्य कलाकारहरू दयाहाङ राई, सौगात मल्ल र तेरिया फौजा मगरको उपस्थितिलाई कलात्मक रूपमा प्रस्तुत गरिएको छ। ग्रामीण परिवेश र पहिरनमा सजिएर नाचेका सौगात र तेरियाको जोडीलाई दर्शकले निकै रुचाएका छन्। लामो समयदेखि एकै प्रकारको भूमिकामा देखिने गरेको भन्दै आलोचना खेप्दै आएका सौगातलाई यस भिडियोमा बिल्कुलै भिन्न र ताजा अवतारमा देख्न पाउँदा दर्शक रोमाञ्चित बनेका छन्। भिडियोको कमेन्ट बक्समा दर्शकहरूले ‘सौगात दाइको अर्को रूप देख्न पाइयो’ भन्दै खुसी व्यक्त गरेका छन्। त्यस्तै, तेरिया मगरको नृत्यको जादुले पनि धेरैको मन जितेको छ। अर्का मुख्य कलाकार दयाहाङ राई भने गीतको भिडियोमा कथाको मागअनुसार स्वाभाविक रूपमा प्रस्तुत भएका छन्।
लोकलयमा आधारित यस कर्णप्रिय गीतमा श्रीकृष्ण बम मल्ल र मेलिना राईको स्वर सुन्न सकिन्छ। गीतको शब्द रचना र सङ्गीत भर्ने काम पनि गायक मल्ल स्वयंले गरेका हुन्। मिङ्मा डि लेप्चाको कोरियोग्राफी गरेका छन्। अनिल बुढा मगरको निर्देशन र जनक घर्ती मगरको लगानीमा जीएम मुभिज प्रोडक्सनको ब्यानरमा निर्माण भएको यस चलचित्रबाट डान्सिङ स्टार तेरिया मगरले अभिनेत्रीका रूपमा ठुलो पर्दामा डेब्यु गर्दैछिन्।
चलचित्रमा दयाहाङ, सौगात र तेरियाका अलावा पुस्कर गुरुङ, शिशिर वाङ्देल, राज थापा, सुवर्ण थापा, अनु थापा, स्मिता लामिछाने, अरुण पुन मगर, उत्तम राज पाण्डे, सविन कट्टेल, उमेश सोनाम, पवित्रा खड्का, चाहाना राना मगर, अनुशा राई, र खड्गबहादुर पुन मगर (खबपु) लगायतका कलाकारहरूको अभिनय रहेको छ।