काठमाडौं – नेपाली चलचित्र क्षेत्रले अन्तर्राष्ट्रिय मञ्चमा एक युगान्तकारी उपलब्धि हासिल गरेको छ। विश्वकै प्रतिष्ठित ७९औँ कान्स चलचित्र महोत्सवको महत्त्वपूर्ण विधा ‘अन सर्टेन रिगार्ड’ मा नेपाली कथानक चलचित्र ‘एलिफेन्ट्स् इन द फग्’ आधिकारिक रूपमा छनोट भएको छ। नेपाली सिनेमाको करिब ६ दशक लामो इतिहासमा कान्स फेस्टिभलको यस विधामा पुग्ने यो नै पहिलो नेपाली चलचित्र बनेको निर्माण पक्षले हर्षोल्लासका साथ जानकारी दिएको छ।
चर्चित चलचित्रहरू ‘कालो पोथी’ र ‘शाम्बाला’ का पटकथाकार समेत रहेका अविनाश विक्रम शाहको लेखन तथा निर्देशन रहेको यो चलचित्र उनको पहिलो फिचर (डेब्यु) निर्देशन हो। यसअघि आफ्नो लघु चलचित्र ‘लोरी’ मार्फत कान्समा अवार्ड जितेर अन्तर्राष्ट्रिय स्तरमा पहिचान बनाइसकेका शाहले यस पटक जङ्गली हात्तीको सन्त्रास झेलिरहेको एउटा सीमान्तकृत अल्पसङ्ख्यक परिवारको मर्मस्पर्शी कथालाई पर्दामा उतारेका छन्। ग्रामीण जनजीवनको यथार्थ र गहिरो सामाजिक संवेदना बोकेको यस चलचित्रमा गौरी मल्ल, माओत्से गुरुङ, शान्ति गिरी, सञ्जय गुप्ता दुरा, महिमा नवबाग र आशान्त शर्मा जस्ता अनुभवी कलाकारका साथै केही नवप्रवेशी अनुहारहरूको सशक्त अभिनय देख्न पाइनेछ।
नेपालको अन्डरग्राउन्ड टकिज र जयन्ती क्रिएसन्सको मुख्य सहकार्यमा निर्माण भएको यस अन्तर्राष्ट्रिय स्तरको प्रोजेक्टमा फ्रान्स, जर्मनी, ब्राजिल र नर्वेका निर्माण कम्पनीहरूले समेत हातेमालो गरेका छन्। अन्डरग्राउन्ड टकिजका तर्फबाट अनुप पौडेल तथा जयन्ती क्रिएसन्सबाट कुमुदिनी गुरुङ श्रेष्ठ, सोहम ढकाल र प्रचण्डमान श्रेष्ठ निर्माताको भूमिकामा छन्। त्यस्तै, मीनबहादुर भाम, प्रवेश गुरुङ, केकी अधिकारी र प्रतीक सुवेदी जस्ता स्थापित सिनेमाकर्मीहरूको पनि यसमा सहनिर्माण रहेको छ। चलचित्रको प्राविधिक पक्ष निकै बलियो छ, जसमा नोए बाक र सिरिलको छायाङ्कन तथा एन्ड्र्यू बर्ड र पेरिस बर्जनको सम्पादन रहेको छ। ध्वनि, सङ्गीत र कला निर्देशनमा समेत अन्तर्राष्ट्रिय विज्ञ टोलीको प्रत्यक्ष संलग्नता रहेको बताइएको छ।
आगामी मे १२ तारिखबाट फ्रान्समा सुरु हुने यस वर्षको कान्स महोत्सवको निर्णायक मण्डल (जुरी) को नेतृत्व दक्षिण कोरियाका प्रख्यात निर्देशक पार्क चान–वूकले गर्दैछन्। महोत्सवको उद्घाटन पियरे साल्भाडोरी निर्देशित सन् १९२० को पृष्ठभूमिमा आधारित कमेडी चलचित्र ‘द इलेक्ट्रिक किस’ को प्रदर्शनबाट हुनेछ। आयोजकका अनुसार यसै संस्करणमा चर्चित हस्तीहरू बार्बरा स्ट्राइस्यान्ड र पिटर ज्याक्सनलाई मानार्थ ‘पाल्मे डओर’ बाट सम्मान गरिने कार्यक्रम छ। विश्वकै ठुलो मञ्चमा पाएको यो दुर्लभ सफलतालाई निर्माण टोलीले सम्पूर्ण नेपाली चलचित्र क्षेत्र र दर्शकको साझा प्राप्तिका रूपमा लिँदै आगामी दिनमा अझै बलिया नेपाली कथाहरू विश्वसामु पस्कने प्रतिबद्धता जनाएको छ।