काठमाडौं – गत शुक्रबारदेखि देशव्यापी प्रदर्शनमा आएको नेपाली चलचित्र ‘मीतज्यू’ले बक्सअफिसमा दर्शकको सुखद साथ पाइरहेको छ। प्रदर्शनको सुरुवाती दिनदेखि नै सिनेमाघरमा देखिएको उत्साहजनक उपस्थितिले उत्साहित बनेको निर्माण टोली यतिबेला प्रत्यक्ष रूपमा दर्शकको प्रतिक्रिया बुझ्न मोफसल दौडाहामा निस्किएको छ। राजधानी काठमाडौंका विभिन्न हलहरूमा दर्शकसँग साक्षात्कार गरेपश्चात्, मुख्य अभिनेता दयाहाङ राई, अभिनेत्री तेरिया फौजा मगर र निर्देशक अनिल बुढा मगरसहितको टोली बुधबार बिहान नेपालगञ्ज, दाङ र बुटवलतर्फ प्रस्थान गरेको हो।
मोफसल यात्राका क्रममा टोलीले ती सहरका स्थानीय सिनेमाघरहरूमा पुगेर दर्शकसँगै बसेर चलचित्र हेर्ने र उनीहरूको प्रत्यक्ष प्रतिक्रिया लिने कार्यक्रम रहेको निर्माण पक्षले जनाएको छ। पर्दाका प्रिय कलाकारहरूलाई आफ्नै सहरमा प्रत्यक्ष रूपमा साक्षात्कार गर्न पाउँदा मोफसलका दर्शकहरूमा चलचित्रप्रतिको आकर्षण अझै बढ्ने र व्यापारिक रूपमा पनि थप फाइदा पुग्ने विश्वास निर्माण टिमको छ।
जीएम मुभिज प्रोडक्सनको ब्यानरमा निर्माण भएको यस चलचित्रमा दयाहाङ राई, सौगात मल्ल र तेरिया मगरको मुख्य भूमिका रहेको छ। उनीहरूका साथमा शिशिर वाङ्देल, खड्गबहादुर पुन मगर, पुष्कर गुरुङ, राज थापा, सुवर्ण थापा, अनु थापा र स्मिता लामिछाने लगायतका अनुभवी तथा नवोदित कलाकारहरूको सशक्त अभिनय यसमा देख्न सकिन्छ।
जनक घर्तीमगरको लगानी रहेको ‘मीतज्यू’को निर्देशन अनिल बुढा मगरले गरेका हुन्। शिशिर विशंखेले दृश्य कैद गरेको (छायांकन) यस चलचित्रलाई लोकेश बज्राचार्यले सम्पादन गरेका हुन्। आरआर फिल्म्सले देशभर वितरणको जिम्मा लिएको यो सिनेमाले गाउँले परिवेश र मितेरी साइनोको कथा पस्कँदै दर्शकको मन जितिरहेको छ।