काठमाडौं – चन्द्र पन्तको निर्देशनमा निर्माण हुन लागेको बहुप्रतीक्षित मल्टिस्टारर चलचित्र ‘आ बाट आमा २’ को मुख्य अभिनेत्रीका रूपमा निकिता आचार्य अनुबन्धित भएकी छन्। निर्माण पक्षले बिहीबार अभिनेत्री आचार्यसँग औपचारिक सम्झौता गर्दै उनलाई चलचित्रको टोलीमा स्वागत गरेको हो। चलचित्रका निर्माता तथा निर्देशक पन्तले निकितालाई चलचित्रको एक अत्यन्तै महत्त्वपूर्ण र मुख्य चरित्रका लागि भित्र्याइएको पुष्टि गरेका छन्। यसअघि पनि नेपाली रजतपटका केही चलचित्रमा आफ्नो अभिनय कला प्रस्तुत गरिसकेकी निकिताको प्रवेशले यस प्रोजेक्टलाई थप आकर्षक बनाएको छ।
आगामी दसैँको पावन अवसर पारेर फूलपातीका दिन (असोज ३० गते) बाट देशव्यापी प्रदर्शनमा आउने यस चलचित्रमा नेपाली र भारतीय सिनेमाका थुप्रै चर्चित अनुहारहरूको जमघट रहनेछ। निकिता जोडिनुअघि नै निर्माण पक्षले अभिनेताद्वय पल शाह र आकाश श्रेष्ठ, अग्रज अभिनेत्री विपना थापा, रिश्ता गुरुङका साथै चर्चित भारतीय अभिनेता प्रदीप रावतलाई मुख्य भूमिकामा अनुबन्धित गरिसकेको छ। यसका अलावा चलचित्रमा कथाको मागअनुसार साइग्रेस पोखरेल, गजित बिष्ट र नरेन खड्का लगायतका स्थापित कलाकारहरूको पनि बलियो उपस्थिति रहनेछ।
चलचित्रको कथा तथा पटकथा लेखनको सम्पूर्ण जिम्मेवारी निर्देशक पन्त स्वयंले सम्हालेका छन्। नाम चलेका स्टार कलाकारहरूको ठूलो भिड र चाडपर्वको विशेष मौका पारेर प्रदर्शन मिति तय गरिएका कारण निर्माणको प्रारम्भिक चरणबाटै ‘आ बाट आमा २’ लाई सिनेवृत्त र दर्शकहरूले निकै चासोका साथ हेरिरहेका छन्।