काठमाडौं – मुख्य अभिनेत्रीका रूपमा मलिका महतलाई अनुबन्ध गरेलगत्तै बहुप्रतीक्षित चलचित्र ‘आ बाट आमा २’ को छायांकन औपचारिक रूपमा सुरु भएको छ। निर्माण पक्षले सोमबार बिहान मकवानपुरको रमणीय स्थल चित्लाङबाट यस सिनेमाको दृश्य कैद गर्न थालेको हो। विशेषगरी दर्शकले निकै रुचाएको पल शाह र मलिका महतको जोडीलाई यस चलचित्रले पुनः पर्दामा सँगै ल्याउँदैछ। मलिकालाई आइतबार मात्रै निर्माण पक्षले नायिकाको रूपमा भित्र्याएको थियो।
निर्देशक चन्द्र पन्तका अनुसार एक महिना लामो छायांकन कार्यतालिका (सेड्युल) तय गरेर चलचित्र फ्लोरमा गएको हो। चित्लाङको सेड्युल सकिएपछि निर्माण टोली काठमाडौँ फर्किनेछ र यहाँका दृश्यहरू खिचिसकेपछि बाँकी महत्त्वपूर्ण छायांकनका लागि सम्पूर्ण टिम बेलायतको लन्डन प्रस्थान गर्ने योजना रहेको छ। स्वदेशदेखि विदेशसम्मका लोकेसनमा खिचिने भएकाले पनि यस सिनेमालाई निकै ठूलो क्यानभासमा निर्माण गर्न लागिएको स्पष्ट हुन्छ।
गत वर्ष बक्सअफिसमा सुखद व्यापार गर्दै सफल साबित भएको चलचित्र ‘आ बाट आमा’ कै सिक्वेलका रूपमा निर्माण हुन लागेको यस चलचित्रमा नेपाली र भारतीय सिने जगत्का चर्चित अनुहारहरूको ठूलो जमघट छ। चलचित्रमा पल र मलिकाका साथै आकाश श्रेष्ठ, सबिन श्रेष्ठ, अग्रज अभिनेत्री विपना थापा, प्रदीप रावत, रिश्ता गुरुङ, निकिता आचार्य, साइग्रेस पोखरेल, गजित विष्ट र नरेन खड्का लगायतका स्थापित कलाकारहरूको बलियो उपस्थिति रहनेछ।
निर्देशक पन्त स्वयंको कथा तथा पटकथा रहेको यो चलचित्र आगामी दसैँको पावन अवसर पारेर असोज ३० गतेदेखि देशव्यापी प्रदर्शनमा आउने घोषणा निर्माण पक्षले यसअघि नै गरिसकेको छ। आर्या इन्टरटेनमेन्ट प्रालिको ब्यानरमा निर्माण भइरहेको सिनेमाको मुख्य व्यवस्थापक (प्रोडक्सन म्यानेजर) को जिम्मेवारी करनसिंह रसालीले सम्हालेका छन्। यसैगरी, चलचित्रको नेपालभरको वितरण अधिकार आरआर फिल्म्सले पाएको छ भने डिजिटल राइट्स ओएसआर डिजिटलले सुरक्षित गरेको छ।