नेपाली दर्शकहरूले अब काठमाडौंमै बसेर चीनका उत्कृष्ट एवं अवार्ड विजेता चलचित्रहरूको स्वाद लिन पाउने भएका छन्। बेइजिङ अन्तर्राष्ट्रिय चलचित्र महोत्सवमा उत्कृष्ट ठहरिएका ६ वटा चिनियाँ चलचित्रहरू आगामी जुन २ देखि ४ तारिख (जेठ १९ देखि २१ गते) सम्म काठमाडौंमा प्रदर्शन हुन लागेका हुन्। बेइजिङ अन्तर्राष्ट्रिय चलचित्र महोत्सवको प्रवर्द्धनात्मक कार्यक्रम ‘टियानतान अवार्ड प्यानोरामा’ अन्तर्गत यी प्रतिष्ठित चलचित्रहरू ठमेलस्थित छायाँ सेन्टरमा सशुल्क प्रदर्शन गरिने व्यवस्थापनको जिम्मा लिएको नेपाल चलचित्र तथा सांस्कृतिक प्रतिष्ठानले जनाएको छ।
यस बृहत् चलचित्र प्रदर्शनीको आयोजना चीन चलचित्र प्रशासन र बेइजिङ अन्तर्राष्ट्रिय चलचित्र महोत्सवले नेपाल चलचित्र तथा सांस्कृतिक प्रतिष्ठानसँगको प्रत्यक्ष सहकार्यमा गर्न लागेका हुन्। यस सांगीतिक तथा सांस्कृतिक आदानप्रदान कार्यक्रमलाई सफल बनाउन काठमाडौंस्थित चिनियाँ सांस्कृतिक केन्द्रका साथै त्रिभुवन विश्वविद्यालय, काठमाडौं विश्वविद्यालय र लुम्बिनी बौद्ध विश्वविद्यालयअन्तर्गतका कन्फुसियस इन्स्टिच्युटहरूले पनि विशेष सहयोग पुर्याएका छन्।
नेपाल चलचित्र तथा सांस्कृतिक प्रतिष्ठानका अध्यक्ष केपी पाठकले दुई देशबीचको सिनेमा संस्कृति आदानप्रदानले नेपाली र चिनियाँ चलचित्रकर्मीबीचको सम्बन्धलाई थप उचाइमा पुर्याउने विश्वास व्यक्त गरेका छन्। चिनियाँ दर्शक र बजार नेपाली सिनेमाप्रति आकर्षित भइरहेको वर्तमान परिप्रेक्ष्यमा यस प्रकारका सहकार्यले नेपाली चलचित्रकर्मीलाई चीन भ्रमण गराउन र त्यहाँ नेपाली चलचित्र महोत्सव आयोजना गर्न चिनियाँ सहयोग बढ्दै गएको उनले बताए। लामो समयदेखि नेपाली चलचित्रलाई चीनको विशाल बजारमा प्रवेश गराउने अभियानमा लागिरहेको प्रतिष्ठानका लागि यस्ता कार्यक्रमहरू एउटा बलियो सेतु र उपयुक्त अवसर बन्न सक्ने अध्यक्ष पाठकको भनाइ छ।
कार्यक्रमको पहिलो दिन अर्थात् जेठ १९ गते तीनवटा चलचित्रहरू प्रदर्शन हुनेछन्। बिहान साढे ११ बजे सागर झाङद्वारा निर्देशित क्राइम थ्रिलर चलचित्र ‘ट्रयाप’ बाट प्रदर्शनीको सुरुवात हुनेछ। सन् १९९५ मा चीनमा बन्दुक प्रतिबन्ध हुनुभन्दा एक वर्षअघि जेलबाट भागेको एउटा कुख्यात गुण्डाले सहरमा मच्चाएको आतङ्कको कथामा आधारित यस चलचित्रले बेइजिङ अन्तर्राष्ट्रिय चलचित्र महोत्सवमा उत्कृष्ट पटकथा र सह-अभिनेताको अवार्डसमेत जितेको थियो। यस चलचित्रको प्रदर्शनपछि दर्शकहरूले निर्देशक झाङसँग प्रत्यक्ष रूपमा प्रश्नोत्तर गर्ने अवसरसमेत पाउनेछन्। त्यसैगरी, दिउँसो ३ बजे झिहाई लिउको निर्देशनमा युद्धको कथा बोकेको ‘बियोन्ड द स्काइज’ र साँझ ५ बजे आमाको खोजीमा निस्किएको एक पात्रको मर्मस्पर्शी यात्रामा आधारित वु शुआङ निर्देशित ‘समर डायरी’ प्रदर्शन हुने तालिका रहेको छ।
महोत्सवको बाँकी दुई दिन (जेठ २० र २१ गते) थप तीनवटा फरक विधाका उत्कृष्ट चलचित्रहरू दर्शकमाझ प्रस्तुत हुनेछन्। जसअन्तर्गत गर्भवती महिला बेपत्ता भएको रहस्यमय घटनामा आधारित रुई कुई र सियाङ लिउ निर्देशित ‘लस्ट इन द स्टार’ प्रदर्शन गरिनेछ। यसका अलावा झाङ लुको निर्देशनमा तयार भएको गहिरो प्रेमकथामा आधारित चलचित्र ‘द स्याडोलेस टावर’ र दाशाङ कोङ निर्देशित साइन्स फिक्सन चलचित्र ‘जर्नी टु द वेस्ट’ पनि प्रदर्शन हुनेछन्। एलियनको खोजीको रोमाञ्चक कथा बोकेको ‘जर्नी टु द वेस्ट’ एक व्यंग्यात्मक वृत्तचित्र (मक्युमेन्ट्री) शैलीमा निर्माण गरिएको सिनेमा हो जसले दर्शकलाई फरक स्वाद प्रदान गर्नेछ।