काठमाडौं – बहुप्रतीक्षित नेपाली चलचित्र ‘कबड्डी ५ : आफ्टर द फाइनल म्याच’को आधिकारिक टिजर सार्वजनिक भएको छ। रामबाबु गुरुङको लेखन तथा निर्देशनमा बनेको चलचित्रले ‘कबड्डी ४ : द फाइनल म्याच’पछि काजी र उसका साथीहरूको कथा कहाँ पुग्छ भन्ने उत्सुकतालाई अगाडि बढाएको छ।
बाँसुरी फिल्म्सको प्रस्तुतिमा बनेको चलचित्र कात्तिक ६ गतेदेखि नेपालका हलमा प्रदर्शन हुँदैछ। यसअघि सार्वजनिक फर्स्टलुकमार्फत प्रदर्शन मिति घोषणा गरिएको थियो।
‘कबड्डी’ शृंखलाको पाँचौँ भागमा दयाहाङ राई काजी, विजय बराल बीके र बुद्धि तामाङ छन्त्यालको भूमिकामा फर्किएका छन्। उनीहरूसँगै विपिन कार्की, रिश्मा गुरुङ, सिर्जना गुरुङ, पुष्कर गुरुङ, कविता आले, अरुणा कार्की, शिशिर बाङ्देल, माओत्से गुरुङ, कमलमणि नेपाललगायत कलाकारको अभिनय छ।
‘कबड्डी ४’लाई यस शृंखलाको अन्तिम भागका रूपमा प्रस्तुत गरिएको थियो। तर निर्देशक रामबाबु गुरुङका अनुसार पात्रहरूको कथा अझै पूर्ण नभएकाले दर्शकको माग र कथाको आवश्यकताअनुसार पाँचौँ भाग निर्माण गरिएको हो। त्यसैले ‘आफ्टर द फाइनल म्याच’ नामले नै चौथो भागपछि काजीको जीवनमा फेरि नयाँ अध्याय सुरु भएको संकेत गर्छ।
सार्वजनिक टिजरमा भने कथा खुलाउनेभन्दा पात्र र उनीहरूबीचको सम्बन्ध तथा द्वन्द्वलाई प्राथमिकता दिइएको छ। काजी, बीके र छन्त्यालको पुरानै शैलीको हाँसो, झगडा र उट्पट्याङ संवादले ‘कबड्डी’को परिचित स्वाद फर्किएको महसुस हुन्छ।
टिजरको अर्को आकर्षण विपिन कार्की हुन्। उनी यसपटक ‘कबड्डी’को संसारमा नयाँ पात्रका रूपमा प्रवेश गरेका छन्। यसअघि नै विपिनले चलचित्रमा आफू खलपात्रको भूमिकामा रहेको बताएका थिए। उनका अनुसार यस भूमिकाका लागि आवरण र आवाजमा समेत फरकपन ल्याउने प्रयास गरिएको छ।
टिजरमा देखिने नयाँ महिला पात्र सिर्जना गुरुङ हुन्। उनले यही चलचित्रमार्फत अभिनयमा डेब्यु गरेकी हुन्। टिजरमा सिर्जनाको पात्रले दयाहाङ राईलाई ‘ओ बुढो मान्छे’ भन्दै जिस्काउँदै पछ्याएको दृश्यले उनी काजीसँग नजिकको सम्बन्धमा रहने संकेत गर्छ। ‘कबड्डी’ शृंखलामा हरेक भागमा नयाँ महिला पात्र तथा नयाँ सम्बन्धले कथालाई अगाडि बढाउने शैलीलाई पाँचौँ भागले पनि निरन्तरता दिएको देखिन्छ।
टिजरको सबैभन्दा ठूलो कौतूहल भने अन्तिम दृश्यले सिर्जना गरेको छ। टिजरको अन्त्यतिर रिश्मा गुरुङ देखिन्छिन्। उनी मैयाँको भूमिकामा काजीलाई पर्खिरहेको संकेत गर्ने दृश्यमा प्रस्तुत भएकी छन्। यो दृश्यले ‘कबड्डी’का पुराना दर्शकका लागि विशेष अर्थ राख्छ। रिश्मा गुरुङले पहिलो र दोस्रो भागमा मैयाँको महत्वपूर्ण भूमिका निर्वाह गरेकी थिइन्। तेस्रो भागमा उनको उपस्थिति सीमित थियो भने चौथो भागमा उनी देखिएकी थिइनन्। पाँचौँ भागमा उनको पुनरागमनले काजी–मैयाँको अधुरो सम्बन्ध फेरि कथाको केन्द्रमा आउन सक्ने सम्भावना देखाएको छ।
टिजरको सबैभन्दा बलियो पक्ष यसको ‘कबड्डी’ शैलीप्रतिको निरन्तरता हो। ठूलो कथा वा घटनाक्रम खुलाउनुको सट्टा पात्रहरूको हाउभाउ, संवाद र सम्बन्धमार्फत उत्सुकता निर्माण गरिएको छ। मुस्ताङका दृश्यले फ्रेन्चाइजको पुरानो भौगोलिक पहिचानलाई पनि निरन्तरता दिएका छन्। तर टिजरले एउटा महत्वपूर्ण प्रश्न पनि छाडेको छ- काजीको अन्तिम प्रेमकथा वास्तवमै अन्त्य भएको थियो त?
एकातिर नयाँ पात्र सिर्जना गुरुङ काजीको पछि लागिरहेकी छन्, अर्कोतिर अन्तिम दृश्यमा पुरानी प्रेमिका मैयाँका रूपमा रिश्मा गुरुङको पुनरागमन हुन्छ। यही दुई महिला पात्रको उपस्थितिले ‘कबड्डी ५’को प्रेम, सम्बन्ध र हास्यको नयाँ समीकरणप्रति दर्शकको उत्सुकता बढाएको छ।
यसैबीच विपिन कार्कीको रहस्यमय उपस्थितिले कथामा द्वन्द्व थप्ने संकेत गर्छ। टिजरले कथा धेरै नखुलाए पनि काजीको अधुरो कथा, पुरानो प्रेमको पुनरागमन, नयाँ महिला पात्र र विपिनको नयाँ चरित्रलाई पाँचौँ भागका प्रमुख आकर्षणका रूपमा स्थापित गरेको छ।
‘कबड्डी ५ : आफ्टर द फाइनल म्याच’ कात्तिक ६ गतेदेखि नेपालमा प्रदर्शन हुँदैछ। नेपालमा चलचित्रको वितरण भेङ्कटेश इन्टरटेनमेन्ट र टी–फोकले गर्नेछन् भने विदेश वितरण सेभेन सिज इन्टरनेसनलले गर्नेछ।
समग्रमा, ‘फाइनल म्याच’ भनिएको कथाको अर्को अध्यायमा काजी कहाँ पुग्यो भन्ने प्रश्नको जवाफ खोज्न चाहने ‘कबड्डी’का दर्शकका लागि टिजरले पुरानो सम्झना र नयाँ कौतूहल दुवै एकैपटक जगाएको छ।