सफल म्युजिक भिडियो निर्देशन गरेर प्रशस्त तारिफ कमाएका निर्देशक प्रशन्न पौडेल निर्देशित लघु चलचित्र ‘होक्से’ अमेरिकाको सिकागोमा हुन लागेको सिकागो चलचित्र महोत्सवको स्क्रिनिङका लागि छनोट भएको छ । आगामी अप्रिल २३ देखि ३० तारिखसम्म चल्ने चलचित्र महोत्सवमा एसियाबाट प्रवेश पाउने एकमात्र चलचित्र होक्से भएको निर्देशक पौडेलले जानकारी दिएका छन् ।
उनका अनुसार अमेरिकाकै चलचित्रहरु प्रतिस्पर्धामा रहने फेस्टिवलमा होक्सेको कथा वस्तुको उत्कृष्ट रहेका कारण छनौटमा पर्ने एसियाकै एकमात्र चलचित्र बन्न पुगेको हो । सात मिनेट लामो सो छोटो चलचित्रमार्फत जीवन बाँच्नका लागि मृगौला बेच्न बाध्य सिन्धुपाल्चोकको एक गाउँ होक्सेको कथा उठान गरिएको छ । गाउँको नाम नै चलचित्रको शिर्षक राखिएको छ । चलचित्रमा गरिबी देखाइएको छैन । नेपाल स्रोत साधनमा निकै धनी छ भनेर देखाउन खोजिएको छ ।
होक्सेमा आर्यन सिग्देल, नम्रता श्रेष्ठ, प्रेम बानियाँ, मधु निहुरेले प्रमुख भूमिकामा अभिनय गरेका छन् भने नायिका केकी अधिकारीका भाई बिम्ब अधिकारीले यसको कथा तयार पारेका हुन् । चलचित्रमा छायांकन विदुर पाण्डे, गीत रोशन लामा, शव्द र निर्माण क्रिश रिजाल, स्वर शिव परियार, सम्पादन प्रकाश तुलाधरको रहेको छ ।