‘मिस्टर भर्जिन’ : तीन भर्जिन युवाको एक रातको कथा

घोषणाको समयदेखि नै नामका कारण चर्चामा रहेको चलचित्र ‘मिस्टर भर्जिन’ शुक्रवारबाट देशैभर प्रदर्शनमा आउँदैछ । सेन्सर बोर्डबाट एडल्ट सर्टिफिकेट पाएको यो चलचित्र यौन मनोविज्ञानमा आधारित छ ।

हालै मोफसल टुर सकेको निर्माण टिमले प्रदर्शनको अघिल्लो दिन राजधानीमा पत्रकार भेटघाट गर्दै चलचित्रको विषयमा जानकारी दिएको छ ।

तीन भर्जिन युवाको एक रातको कथा बोल्ने चलचित्रमा गौरव पहारी, विजय बराल, कमलमणी नेपाल, मरिश्का पोखरेल, भोलाराज सापकोटा, रविन्द्र झा, सिर्जना सुब्बा लगायतका कलाकारको अभिनय रहेको छ ।

निर्देशक विशारद बस्नेतले पहिलो पटक नेपालमा सेक्स कमेडी चलचित्र बनेको भन्दै दर्शकले रुचाउनेमा विश्वस्त रहेको बताए । उनी भन्छन्, ‘नामका कारण नाक खुम्च्याउनु पर्दैन । सबैले हेर्न मिल्ने चलचित्र बनेको छ ।’ युवापुस्तालाई चलचित्रको कथावस्तुले आकर्षित गर्नेमा उनी विश्वस्त सुनिए ।

अभिनेता गौरवले ‘मिस्टर भर्जिन’ समाजको यर्थाथ कथा रहेको बताए । अभिनेत्री मरिश्काले चलचित्रको कन्टेन्ट बलियो भएका कारण दर्शक निराश हुनु नपर्ने बताइन् । यसमा उनले यौनकर्मी (रोजी) को भूमिका निर्वाहा गरेकी छन् ।

तीन युवाको यौनप्रतिको सोच र उनीहरुको दौडधुपको कथा चलचित्रले वाचन गर्ने कलाकार कमलमणी नेपाल बताउँछन् । यस चलचित्रमा खिलेन्द्र तिमल्सिना, प्रजापति सिवाकोटी, मुकेश रेग्मी र बिशारद बस्नेतको लगानी रहेको छ भने सह-निर्माताको रुपमा सन्दिप उप्रेती रहेका छन् ।

वल्ड वाइड फिल्म्स डिस्ट्रिव्यूसन प्रा.ली.को ब्यानरमा निर्माण भएको चलचित्रमा महेश दवाडीको कथा, रामेश्वर कार्कीको छायाङ्कन, विक्रम स्वाँर, दीपक याम सिंहको कोरियोग्राफी, सुरज पण्डित, श्रीकृष्ण बम मल्ल, बुलेट फ्लो, आधा सुर, आर जे, मिस्टर प्रिन्सको संगीत र मिलन डी. काप्रीले सम्पादन रहेको छ ।