काठमाडौं – अभिनेता जितु नेपाल र अभिनेत्री प्रियना आचार्य (मुन्नी) को मुख्य अभिनय रहेको चलचित्र ‘कार्की साइँला’ ले आफ्नो प्रदर्शन मिति परिवर्तन गर्दै नयाँ मिति तय गरेको छ। निर्माण पक्षले बुधबार चलचित्रको एक पोस्टर सार्वजनिक गर्दै आगामी असोज २ गते लाई नयाँ प्रदर्शन मितिको रूपमा घोषणा गरेको हो। यसअघि यो सिनेमा आगामी साउन १ गतेबाट प्रदर्शनमा ल्याउने तयारी गरिएको थियो। अब यो चलचित्र ‘झिँगेदाउ’सँग एकसाथ रिलिज हुनेछ।
सार्वजनिक गरिएको नयाँ पोस्टरमा चलचित्रका मुख्य पात्र जितु र प्रियनालाई निकै रोमान्टिक र प्रेमिल अन्दाजमा प्रस्तुत गरिएको छ। पोस्टरमा देखिएको उनीहरूबीचको यो आत्मीय भावले चलचित्रमा बलियो प्रेमकथा समावेश रहेको सहजै अनुमान लगाउन सकिन्छ। सिनेमाको नामले नै ‘कार्की साइँला’ नामक एक भरियाको जीवनयात्रा, उसको सङ्घर्ष र भोगाइको कथा भन्ने सङ्केत गरेको छ। यस चलचित्रलाई थप जीवन्त बनाउन पूर्वी नेपालका अत्यन्तै रमणीय स्थलहरू धनकुटा, सुनसरीको बराहक्षेत्र र चतरालगायतका स्थानहरूमा यसको सम्पूर्ण छायाङ्कन गरिएको छ। सिनेमाको मूल कथावस्तु र थप रहस्य जान्नका लागि भने दर्शकले आगामी टिजर, ट्रेलर वा चलचित्र नै कुर्नुपर्ने हुन्छ।
राजेन्द्र बस्नेतको निर्देशनमा तयार भएको यस चलचित्रमा जितु र प्रियनाका साथै सुशील पोखरेल, बीरेन्द्र सिंह कुशवाह, मान्शी शर्मा, मनिल तामाङ, रेणुका आचार्य, दिप्सन लिम्बु, रोदा राई र कमल देवकोटा लगायतका थुप्रै कलाकारहरूको जीवन्त अभिनय देख्न पाइनेछ। कर्णबहादुर फिल्मस् प्रालिको ब्यानरमा निर्माण भएको यस सिनेमामा बालकुमार राईले निर्माताको जिम्मेवारी सम्हालेका छन् भने कृष्ण भगत चाम्लिङ प्रस्तुतकर्ता र अनन्त राई कार्यकारी निर्माताका रूपमा जोडिएका छन्।
चलचित्रको प्राविधिक तथा लेखन पक्ष पनि निकै मजबुत रहेको छ। सबिन अधिकारी र शङ्कर धितालले यसको कथा लेखन गरेका हुन् भने रोजल थापाले मुख्य सहायक निर्देशकको भूमिका निर्वाह गरेका छन्। डम्बर राईको उत्कृष्ट छायाङ्कन रहेको यस चलचित्रमा किरण दाहालको द्वन्द्व निर्देशन (एक्सन) र दिप्सन लिम्बुको सङ्गीत रहेको छ।