‘गोजीमा दाम छैन’ गीत रिलिज भएसँगै चर्चामा रहेको कात्तिक १६ गतेलाई प्रदर्शन मिति घोषणा गरिएको चलचित्र ‘चङ्गा चेट’ को दोस्रो गीत रिलिज भएको छ ।
‘ढल्की ढल्की…’ मा रियल जोडी अभिनेत्री प्रियंका कार्की र अभिनेता आयुष्मान जोशी फिचर्ड छन् । आयुष्मान, प्रियंकालाई जीएफ नभएर पर्मानेन्ट बुढी बनाउने बताउँदैछन् । सन्दिप क्षेत्री, रबिन्द्र झा, सुरक्षा पन्त र परमिता आरएल राणा पनि भिडियोमा प्रस्तुत छन् ।
अल्मोडा राना उप्रेतीको स्वर रहेको गीतमा हरिहर तिमल्सिनाको शब्द तथा मिस्टर आरजेको संगीत छ । प्रविन सिंह गीतका कोरियोग्राफर हुन् । दीपेन्द्र के. खनाल निर्देशित चलचित्रलाई माधव वाग्ले र शर्मिला पाण्डेले सयूंक्त रुपमा बनाएका हुन् ।
चलचित्रको कथा प्रदीप भारद्वाजले लेखेका हुन् । यो चलचित्रमा अर्जुन पोखरेलको पनि संगीत छ । निरक कँडेलको छायांकन रहेको चलचित्रको सम्पादन दिर्घ खड्काले गरेका छन् । चलचित्र डार्क कमेडी रहेको निर्देशक खनाल बताउँछन् ।
निश्चल बस्नेत, बेनिशा हमाल र ऋचा शर्माको विशेष भूमिका रहेको चलचित्रमा सूर्य ठोकरको द्वन्द्व छ । पहिलो गीतबाट मिलेको सकारात्मक प्रतिक्रियाले उत्साहित भएको निर्माण टिम दोस्रो गीतलाई पनि दर्शकले रुचाउनेमा विश्वस्त देखिएको छ ।
गीत हेर्नुहोस् :-