असोज ५ गतेबाट प्रदर्शनमा आउन लागेको रेनाशा वान्तवा राई निर्देशित चलचित्र ‘इन्टु मिन्टु लन्डनमा’ को ओएसटी गीत रिलिज भएको छ । ‘आई एम इन्टु सि इज मिन्टु’ गीतमा लिड अभिनेता धिरज मगर र अभिनेत्री साम्राज्ञी आरएल राणा फिचर्ड छन् ।
सुजिल कमार्चायको शब्द तथा संगीत, केतन क्षेत्री र सुजिल कमार्चायको स्वर रहेको गीतमा श्रेया सोताङ्गले पनि गायनमा साथ दिएकी छन् । गीतको कोरियोग्राफी विक्रम लामा र एन्जिला खत्रीले गरेका हुन् ।
यसलाई प्रज्ज्वल समशेर जबरा र प्रभु समशेर जबराले संयूक्त रुपमा निर्माण गरेका हुन् । चलचित्रमा मिरा अर्थात् मिन्टुको भूमिकामा साम्राज्ञी, इशान अर्थात् इन्टुको भूमिकामा धिरज प्रस्तुत छन् ।
आई कोर फिल्मस्को व्यानरमा निर्मित ‘इन्टु मिन्टु लन्डनमा’ का सह-निर्माताहरुमा सुलेखा राई, बसन्त तामाङ र सुष्मिता जिरेल रहेका छन् । चलचित्रको लेखकमा अभिमन्यु दिक्षित र रेनाशा रहेका छन् भने, आभास कर्माचार्यको संवाद रहेको छ ।
गीत हेर्नुहोस् :-
शैलेन्द्र धोज कार्कीको छायांकन रहेको चलचित्रमा टिसूजिल कर्माचार्य, हर्कुलस बस्नेत, स्वप्न सुमन र बसन्त सापकोटाको संगीत रहेको छ ।
प्रज्ज्वल समशेर जबरा र रेनाशाकै कथा रहेको रोमान्टिक लभस्टोरीमा साम्राज्ञी र धिरजसँगै सारुक ताम्राकार, अर्जुन श्रेष्ठ, दिलभुषण पाठक, विजय लामा, रुवी राणालगायत मुख्य भूमिकामा छन् ।