धमला भन्छन्, ‘माया गर्नेहरुका लागि बनाइएको हो ‘अनुराग’

प्रख्यात पत्रकार ऋषि धमला चलचित्र निर्माता बनेका छन् । उनले निर्माण गरेको चलचित्र ‘अनुराग’ यही असोज १२ गतेबाट हलमा लाग्दैछ । यो चलचित्रबाट उनकी श्रीमती एलिजा गौतमले अभिनयमा डेब्यु गरेकी छन् ।

आफ्नो व्यस्त दैनिकीबाट समय निकालेर यतिबेला धमला स्वयम चलचित्रको प्रचारमा दौडिरहेका छन् । आइतवार टिमसँग पोखरा पुगेर उनले पत्रकारसँग साक्षात्कार गरे । उनले चलचित्रलाई हाँसो र रोदनको एउटा फुल प्याकेज भन्दै एकपटक सबैले हेर्नुपर्ने बताए ।

‘माया गर्नेहरुको लागि बनाइएको चलचित्र हो यो,’ उनले भने, ‘जसले प्रेम गर्छ, त्यसले देशलाई पनि माया गर्छ ।’ चलचित्र मनोरञ्जनको लागि मात्र नभई सन्देश मूलक पनि हुनुपर्नेमा उनले जोड दिए ।

अभिनेत्री एलिजाले बनिरहेका चलचित्रभन्दा ‘अनुराग’ मा फरक पाउने दाबी गरिन् । उनले भनिन्, ‘चलचित्रमा म सिम्पल केटी अनुको भुमिकामा छु ।’ निर्देशक सत्यराज चौलागाईँ चलचित्रलाई सांगीतिक लभस्टोरी भन्न चाहन्छन् ।

‘अहिले संगीतप्रतिको मायालाई चलचित्रमा बुनिएको छ,’ उनले भने,‘ आशा छ, मेरो डेब्यु चलचित्रले दर्शकको मन जित्नेछ ।’ डेब्यु ब्वाई समुन्द्र पण्डितले ‘अनुराग’ बाट आफूले ठूलो अपेक्षा राखेको बताए ।

‘मैले गायकको भुमिका निर्वाह गरेको छु,’ उनले भने, ‘चलचित्रमा गीतसंगीतलाई माया गर्ने संगीत प्रेमीको रुपमा मलाई देख्न सकिनेछ ।’ एरिका फिल्म्सको ब्यानरमा चलचित्र निर्माण भएको हो ।

उक्त चलचित्रमा ठिलेंन लामा, सरोज खनाल, रुपा राना, राजाराम पौडेल, शिशिर राना, मोहन निरौला, विश्व बस्नेतलगायतका कलाकारहरुको पनि अभिनय छ ।

निर्देशक चौलागाईं र आगत केसीको पटकथा तथा संवाद रहेको यो चलचित्रका निर्माता भरत गौतम र गीता भेटवाल हुन् । ‘अनुराग’ को कथा किरण दाहालले लेखेका हुन् भने रामकुमार केसी छायाँकार हुन् ।