काठमाण्डौ। ‘म्यानहन्ट नेपाल २०१६’का मिष्टर पर्सनालिटी तथा ‘टप मोडल नेपाल २०१८’ विजेता निशान चौहान गएको चैत २० गते बेलायतको लण्डनमा भएको ‘टप मोडल वर्ल्डवाइड २०१८’को टप टेनमा पुग्न सफल भएका छन् ।
टप टेनमा पुगेर बाहिरिएपनि उनको लगनशिलता देखेर आयोजक संस्थाले र्याम्पका लागि अप्रोज गरेको थियो । साढे ५ महिना लामो लण्डन बसाईपछि हालै नेपाल फर्किएका उनले पारिश्रमिक लिएर मात्र आफू र्याम्पमा उत्रिएको बताउँछन् ।
उनी भन्छन्, ‘टप मोडल वर्ल्डवाइड २०१८’ को उपाधि जित्छु भनेरै लण्डन गएको थिएँ तर त्यहाँ पुगेपछि आफूलाई अझै धेरै सिक्नु पर्ने महशुस गरेँ । र, धेरै कुरा सिकेर फर्किएको छु ।’ फिल्म ‘पर्व’ मा समेत काम गरेका उनले एक नेपालीले लण्डनमा पुगेर संसारभरका मोडलसँग प्रतिष्पर्धा गर्न पाउँदा निकै गर्व लागेको पनि बताए ।
सन् २०१६ बाट मोडलिङ्ग सुरु गरेका २९ बर्षिय बिरगञ्ज, पर्सा निवासी निशानले लण्डन जानुअघि काठमाण्डौमा नै रहेर आफ्नो मोडलिङ्ग करिअरलाई अगाडी बढाईरहेका थिए । उनले कलर्स मोबाईल, डाबर नेपाल, एसआर स्टील तथा यूएसएड नेपालको परिवार योजनाको विज्ञापन लगायत अन्य थुप्रै टेलिभिजन विज्ञापनमा समेत अभिनय गरिसकेका छन् ।