माओत्से गुरुङको निर्देशन रहेको चलचित्र ‘दयारानी’ को फस्टुलक सार्वजनिक गर्दै प्रदर्शन मिति घोषणा गरिएको छ । मंगलबार राजधानीमा एक कार्यक्रमका बीच निर्माण टिमले अर्को वर्षको जेठ १० गतेलाई प्रदर्शन मिति घोषणा गरेको छ ।
फस्टलुक पोस्टरमा अभिनेता दयाहाङ राई रोमान्टिक अन्दाजमा देखिएका छन् भने अभिनेत्री दीया पुनलाई लजालु र दयालु स्वभावकी यूवतीको रुपमा चित्रण गरिएको छ । अभिनेता दयाहाङले आफ्नो नामसँग मिल्ने भएर ‘दयारानी’ नाम नराखिएको बताए ।
उनी भन्छन्, ‘चलचित्रको कथाअनुसार नाम जुराइएको हो । मेरो नामसँग चलचित्रको टाइटलको कुनै सम्बन्ध छैन ।’ निर्देशक माओत्सेका अनुसार, एक खराब श्रीमान र एक दयालु श्रीमतीको कथा चलचित्रले भन्नेछ ।
निर्देशक भन्छन्, ‘दयाहाङको नामसँग मिल्ने भएर चलचित्रको नाम ‘दयारानी’ राखिएको होइन । गुरुङ समुदायमा दयालु यूवतीलाई दयारानी भन्ने गरिन्छ । चलचित्रमा अभिनेत्री दीयालाई दयालु युवतीको रुपमा ब्याख्या गर्न खोजिएको छ ।’ सिनेमा आर्टस्को ब्यानरमा निर्माण भएको चलचित्रको कथा निर्देशक स्वयम्ले लेखेका छन् ।
चलचित्रमा दया र दीयाका अलावा विजय बराल, प्रमिसा गुरुङ, पुस्कर गुरुङ, टिकाराम घलेलगायतका कलाकारहरुको अभिनय छ । चलचित्रलाई शैलेन्द्र डि. कार्कीले खिचेका हुन् । लगानीमा मोहन गुरुङ, किरण गुरुङ, केन्द्र लिम्बु र न्यू आइटी भेन्चरको सहकार्य छ भने रामबाबु गुरुङ र अपिल विष्ट कार्यकारी निर्मातामा छन् ।