‘जात्रै जात्रा’ र ‘वीरविक्रम २’ एकैदिन

दुई वर्ष अगाडि प्रदर्शनमा आएको हिट चलचित्र ‘जात्रा’ को सिक्वेल ‘जात्रै जात्रा’ बैशाख २७ मा पनि प्रदर्शनमा नआउने भएको छ । फागुन १७ मा फिल्म ‘क्याप्टेन’ सँग एकसाथ प्रदर्शनमा आउने निश्चित भए पनि छायांकन पूरा नभएपछि केही दिन अगाडि मात्र बैशाख २७ लाई चलचित्रको नयाँ प्रदर्शन मिति घोषणा गरिएको थियो ।

उक्त मितिमा बलिउडको प्रतिक्षीत चलचित्र ‘स्टुडेन्ट अफ दि इयर २’ आउन लागेका कारण ‘जात्रै जात्रा’ घोषित मितिभन्दा एक हप्ता पछाडि सरेको छ । अब जेठ ३ गते यो चलचित्र प्रदर्शनमा आउनेछ ।

उक्त डेट राखेर निर्माण टिमले आइतवार पहिलो गीत सार्वजनिक गर्दैछ । यो फिल्मलाई हप्ता दिन पछाडि सर्दा पनि बक्सअफिसमा सहज भने हुनेछैन ।

जेठ ३ मा अर्को प्रतिक्षीत चलचित्र ‘वीरविक्रम २’ पनि रिलिज हुँदैछ । दुबै हिट चलचित्रको दोस्रो सिरिज भएका कारण दर्शकमा दुबै चलचित्रको प्रतिक्षा छ । ‘वीरविक्रम २’ मा पल शाह, वर्षा सिवाकोटी र नाजिर हुसेन लिड रोलमा छन् । भने, प्रदीप भट्टराई निर्देशित फिल्म ‘जात्रै जात्रा’ मा विपिन कार्की, वर्षा राउत, दयाहाङ राई, रविन्द्र झालगायतका कलाकारहरुको अभिनय छ ।