४५ लाखमा विक्री भयो ‘दाल भात तरकारी’ को अष्ट्रेलिया राइट्स

बैशाख २० गतेबाट प्रदर्शनमा आउन लागेको सुदन केसी निर्देशित मल्टिस्टारर चलचित्र ‘दाल भात तरकारी’ को नेपाल रिलिज नहुँदै अहिले विदेशमा चर्को माग छ । विभिन्न देशबाट फिल्मको राइट्स लिन निर्मातालाई दिनमै दर्जन बढी व्यक्तिको फोन आउने गरेको छ । अब भने चलचित्रको राइट्स विक्री सुरु भएको छ ।

ओभरसिजमा नेपाली चलचित्रको ठूलो बजार मानिने अष्ट्रेलियामा महँगो मुल्यमा चलचित्र विक्री भएको निर्माता मध्येका एक किरण केसीले जानकारी दिएका छन् । उनले विपिन बस्नेत र लाुर्क लामाले ४५ लाखमा अष्ट्रेलिया राइट्स खरिद गरेको बताए । चलचित्रको आधा लगानी लगभग अष्ट्रेलिया राइट्सबाटै उठेको देखिन्छ । अन्य देशमा पनि चलचित्रको माग बढ्दो रहेको किरण बताउँछन् ।

हरिवंश आचार्य र निरुता सिंह चलचित्रमा श्रीमान्-श्रीमतीको भूमिकामा छन् । ‘मंगलम’ फेम्ड अभिनेता पुष्प खड्का र अभिनेत्री आँचल शर्मा प्रेम-प्रेमिकाको रुपमा प्रस्तुत छन् । हरेक मानिसले दात भात तरकारी खानका लागि गर्ने संघर्षको कथामा चलचित्र आधारित रहेको बताइएको छ ।

बर्षा राउत, राजाराम पौडेल, प्रियंका कार्की, विल्सन विक्रम राई, यमन श्रेष्ठ, शिवहरी पौडेल, किरण केसीलगायतका कलाकारहरुको पनि फिल्ममा अभिनय रहेको छ । चलचित्रलाई दिर्घ गुरुङले खिचेका हुन् । यसमा प्रमिला आचार्य, यमन श्रेष्ठ, शिवहरी पौडेललगायत निर्मातामा छन् । चलचित्रको कथा, पटकथा तथा संवाद हरिवंश आचार्यले लेखेका हुन् ।