‘रातो टिका निधारमा’ मा बाँधियो रबिन्द्र र नीताको जोडी

निर्देशक अशोक शर्मा अर्को दशैंमा चलचित्र ‘रातो टिका निधारमा’ लिएर आउँदैछन् । अहिले उनी चलचित्रका लागि कलाकार चयनमा जुटेका छन् । लिड अभिनेता र अभिनेत्रीबाहेक अरु कलाकार फाइनल भएको निर्देशक शर्माले जानकारी दिए । सोमवार मात्र अभिनेत्री नीता ढुंगाना चलचित्रमा अनुबन्ध भएकी छन् ।

उनी चलचित्रकी लिड अभिनेत्री भने होइनन् । उनको जोडी चलचित्रमा हास्यकलाकार रबिन्द्र झासँँग बाँधिनेछ । बैशाख अन्तिम साता वा जेठ पहिलो साताबाट छायांकन सुरु हुने चलचित्रमा नीता र रबिन्द्रबाहेक बुद्धि तामाङ, जयनन्द लामा, राजाराम पौडेल, शिवहरी पौडेल, लक्ष्मी गिरी फाइनल भइसकेका छन् ।

केही दिनयता चलचित्रको गीत रेकर्डिङको काम भइरहेको निर्देशक शर्माले बताए । फिल्ममा दर्शक अगाडि प्रदर्शनमा आएको निर्देशक शर्मा निर्देशित चलचित्र ‘अल्लारे’ मा समावेश ‘रातो टिका निधारमा’ गीतलाई रि-एरेञ्ज गरेर राखिने छ । यो गीत अहिले पनि उतिक्कै लोकप्रिय छ ।

पुरुषोत्तम प्रधानले खिच्ने ‘रातो टिका निधारमा’ मा शम्भुजित बाँस्कोटाको संगीत रहनेछ । निर्देशक अशोक शर्माले १२ वर्षपछि चलचित्र ‘जय भोले’ मार्फत् निर्माण र निर्देशनमा कमब्याक गरेका थिए । कमब्याक चलचित्र सफल भएपछि उनी अब फिल्म निर्देशनलाई निरन्तरता दिने सोचमा छन् ।