तेस्रो पटक पूजा र आकाशको टिमअप

चलचित्रको पर्दामा दर्शकहरुले निकै रुचाएको जोडी अभिनेत्री पूजा शर्मा र अभिनेता आकाश श्रेष्ठ तेस्रो पटक पनि एकसाथ चलचित्रमा देखिने भएका छन् । गत वर्ष प्रदर्शनमा आएको चलचित्र ‘रामकहानी’ मा पहिलो पटक रोमान्स गरेका यी दुईको दोस्रो चलचित्र ‘सम्हालिन्छ कहिले मन’ मा पनि जोडी बाँधिएको छ । हालै यो चलचित्रको यूके सेड्युल पूरा गरेर निर्माण टिम राजधानी फिरेको छ ।

करीब २ महिना लामो यूके बसाईपछि राजधानी फर्किएको केही दिनमा नै पूजा र आकाशले तेस्रो पटक पनि साथमा काम गर्ने निर्णय लिएका छन् । ‘तिमीसँग’ फेम्ड निर्देशक शिशिर राणाले निर्देशन गर्ने नयाँ चलचित्र ‘पोई पर्‍यो काले’ मा दुई अनुबन्ध भएका छन् । नयाँ वर्ष २०७६ को दिन आइतबार निर्माण टिम र अभिनेता-अभिनेत्रीबीच औपचारिक रुपमा कागजी सम्झौता भएको हो ।

दुबैले कथावस्तु मनपरेका कारण चलचित्र गर्न राजी भएको बताएका छन् । चलचित्रका प्रस्तुतकर्ता श्यामबहादुर थापा हुन् । रघु परियार र किरण नेपाली कार्यकारी निर्माता रहेको चलचित्रका निर्माता दिपक मनाङ्गे हुन् । फिल्ममा पुरुषोत्तम न्यौपाने र शीव गौतमको संगीत रहनेछ । निर्देशक राणाले रुप भन्दा पनि मन राम्रो हुनुपर्छ भन्ने कथालाई चलचित्रले प्रस्तुत गर्ने बताए ।