बन्ने भयो ‘खलनायक २’

केही वर्षदेखि सुपरहिट चलचित्रको सिक्वेल निर्माण भइरहेको अवस्थामा निर्माता रोज राणाले पनि आफ्नो दशक अगाडिको सुपरहिट चलचित्र ‘खलनायक’ को सिक्वेल बनाउने भएका छन् । निर्देशक ऋषि न्यौपाने निर्देशित यस चलचित्रमा एक जमनाका तीन सुपरस्टार अभिनेता राजेश हमाल, विराज भट्ट र निखिल उप्रेतीको प्रमुख भूमिका थियो ।

चलचित्रमा अभिनेत्री झरना थापा लिड हिरोइन थिइन् । सिक्वेलमा भने पुराना कलाकार नदोहोरिने निर्माता राणले जानकारी दिएका छन् । उनले भने- ‘सम्भवतः पुराना कलाकारहरु कोही दोहोरिने छैनन् । अहिलेका चलेका कलाकारहरुकै अभिनय रहनेछ । यद्यपि, कलाकार फाइनल भने गरेका छैनौं ।’

‘जय परशुराम’ र ‘मेरो पैसा खोई ?’ फिल्म निर्देशन समेत गरिसकेका निर्माता राणाले ‘खलनायक २’ को निर्देशनको जिम्मेवारी भने ‘रणवीर’ फेम्ड निर्देशक गोविन्द सिंह भण्डारीलाई सुम्पिएका छन् । साउनबाट छायांकन सुरु हुने चलचित्रको कथा अहिले मौनता श्रेष्ठले लेखिरहेका छन् । यो चलचित्रको पहिलो पार्टमा पनि उनकै कथा थियो ।

चलचित्रमा एन.वी महर्जनको एक्सन रहनेछ । बिल्कुलै नयाँ कथामा निर्माण हुन लागेका कारण ‘खलनायक २’ मा विराज, निखिल र राजेशलाई दोहोर्‍याउन नसकिएको निर्माता राणाको भनाई छ । यो चलचित्रको पहिलो पार्टमा विराज र निखिलबीच जबरजस्त एक्सन थियो ।