‘प्रेमगीत ३’ का लागि अभिनेत्रीको अडिसन आह्वान

यस वर्षको अन्तिम महिनाको अन्तिम हप्ता अर्थात् चैत २८ गतेबाट प्रदर्शनमा आएको चलचित्र ‘प्रेमगीत ३’ को मुख्य अभिनेत्रीका लागि निर्माण टिमले अडिसन आह्वान गरेको छ । निर्माता सन्तोष सेनले संसारभरबाट अडिसनका लागी सहभागी हुन सक्ने एक विज्ञप्तीमार्फत् बताएका छन् । निर्माता सन्तोष सेन र छेतेन गुरुङले चलचित्रलाई निर्देशन गर्दैछन् ।

यस चलचित्रको दुई सिरिजमा प्रमुख भूमिका निभाएका अभिनेता प्रदीप खड्काले नै ‘प्रेमगीत ३’ मा प्रेमको भूमिका निभाउनेछन् । उनको अपोजिट अर्थात् गीतको भूमिकाका लागि भने निर्माण टिमले अडिसन आह्वान गरेको छ । सोमवार निर्माता सेनले जारी गरेको एक विज्ञप्तीमा १८ वर्ष भन्दामाथि र २५ वर्ष नपुगेका युवतीहरुले चलचित्रको लिड क्यारेक्टर ‘गीत’ का लागि अडिसन दिन सक्ने उल्लेख छ ।

विज्ञप्तीमा भनिएको छ, ‘आउँदो जेठ १० गतेसम्ममा www.aasusenfilms.com मा गएर फारम भर्न सकिने वा [email protected] मा सम्पर्क गर्न सकिने छ । फिल्मको मुख्य अभिनेत्री हुन इच्छुकले हालै खिचिएको चारवटा स्पष्ट अनुहार देखिने तश्बिरसहित आफ्नो बायोडाटा पठाउनु पर्नेछ । भने, उचाई ५.२ देखि ५.७ सम्म हुनुपर्नेछ ।’

आवेदन आएको मध्येबाट उत्कृष्ट २० लाई फाइनल अडिसनका लागि छानिने र एक जनालाई अभिनेत्रीको रुपमा छनोट गरिने जारी विज्ञप्तीमा उल्लेख छ । यस चलचित्रको कथा २ सय वर्ष पुरानो रहेको बताइएको छ । चलचित्रलाई ‘निषेध गरिएको प्रेमकथा’ भनिएको छ । झण्डै एक वर्षदेखि चलचित्रको स्क्रिप्टको काम भइरहेको र अबको दुई हप्तामा पूरा हुने निर्माता सेनले बताएका छन् ।