प्रदर्शनमा आए ‘जात्रै जात्रा’ र ‘बीर विक्रम २’

यस वर्षका दुई प्रतिक्षीत चलचित्रको रुपमा हेरिएको चलचित्र ‘जात्रै जात्रा’ र ‘बीर विक्रम २’ ले शुक्रवारबाट एकसाथ प्रदर्शन सुरु गरेका छन् । ‘बीर विक्रम २’ लाई मिलन चाम्सले निर्देशन गरेका हुन् । ‘जात्रै जात्रा’ का निर्देशक प्रदीप भट्टराई हुन् । दर्शकले दुबै चलचित्रको गीतसंगीत र ट्रेलरलाई निकै रुचाएका छन् । लोभलाग्दो हाइप बनाएका दुबै चलचित्र मल्टीस्टारर हुन् ।

एकसाथ प्रदर्शनमा आएका कारण दुबै चलचित्रलाई व्यावसायिक सफलता हासिल गर्नुपर्ने सबैभन्दा ठूलो चुनौती छ । ‘जात्रै जात्रा’ मा विपिन कार्की, रविन्द्र झा, रविन्द्र सिंह बानियाँ, दयाहाङ राई, बर्षा राउत, राजाराम पौडेललगायतका कलाकारहरुको अभिनय छ । यो चलचित्रका कार्यकारी निर्माता रविन्द्र सिंह बनियाँ हुन् ।

चलचित्रमा यज्ञश्वर पौडेल र सिंगे लामाको लगानी छ । हिट चलचित्र ‘जात्रा’ को सिक्वेल भएका कारण यो चलचित्रप्रति दर्शकमा निकै ठूलो अपेक्षा छ । मित्र डि. गुरुङको सम्पादन रहेको चलचित्रलाई शिवराम श्रेष्ठले खिचेका हुन् । यसमा शंकर महर्जन द्वन्द्व निर्देशन छ । निर्देशक भट्टराई आफैंको कथा रहेको चलचित्रमा कालीप्रसाद बाँस्कोटा र कृष्ण भारद्वाजको संगीत छ ।

यस्तै, मित्रताको कथा वाचन गर्ने चलचित्र ‘बीर विक्रम २’ मा वर्षा सिवाकोटी, पल शाह, नाजिर हुसेन, बुद्धि तामाङको प्रभुख भूमिका छ । चलचित्रले बुधवार राजधानीमा भएको प्रिमियरमा राम्रो प्रतिक्रिया बटुलेको थियो । यो चलचित्र करीब ३ वर्ष अगाडि प्रदर्शनमा आएको चलचित्र ‘बीर विक्रम’ को दोस्रो सिरिज हो ।

यसका छायाँकार सुदीप बराल हुन् । उनले निर्देशक चाम्सका हरेक चलचित्र खिच्दै आइरहेका छन् । अपर्ण सापकोटा निर्माता रहेको चलचित्रमा देशभक्त खनाल, विनिशा भण्डारी, विनोद सुवेदी खत्री, मनिष लिम्बुलगायतका कलाकारहरुको पनि अभिनय छ । हिमाल केसीको द्वन्द्व रहेको चलचित्रको कथा प्रदीप भारद्धाजले लेखेका हुन् ।