जेठ ३१ गतेबाट प्रदर्शनमा आउन लागेको चलचित्र ‘प्रेम दिवस’ युट्युबमा सार्वजनिक भएको छ । प्रेम, विछोड र रोदनले भरिएको ट्रेलरमा अभिनेत्री प्रियंका कार्कीको दोहोरो प्रेम देखाइएको छ । उनी, अभिनेता आयुष्मान देशराज जोशी र नव-अभिनेता विशाल खरेलको प्रेममा हराएकी छन् ।
ट्रेलरले चलचित्र त्रिकोणात्मक प्रेमकथामा आधारित रहेको प्रस्ट्याउँछ । प्रियंकाको एक गरिब र धनी युवकसँग प्रेम रहँदा आइपर्ने उचारचढावमा केन्द्रिय यस चलचित्रलाई योगेश घिमिरेले निर्देशन गरेका हुन् । चलचित्रमा हेमन्त बुढाथोकी, शिव शंकर रिजाल, उत्तम केसी, सञ्जय न्यौपाने, श्रीकृष्ण लुइँटेललगायतका कलाकारहरुको पनि अभिनय छ ।
निर्देशक घिमिरे ‘प्रेम दिवस’ लाई म्यूजिकल लभस्टोरी भन्न चाहन्छन् । रोशन श्रेष्ठको द्वन्द्व रहेको चलचित्रमा बनिष शाह र मिलन श्रेष्ठको सम्पादन, मानकृष्ण महर्जनको छायांकन छ । मनिष दाहाल निर्माता रहेको चलचित्रका कार्यकारी निर्माता सञ्जय न्यौपाने हुन् । चलचित्रको कथा प्रदीप भारद्वाजले लेखेका हुन् ।
‘प्रेम दिवस’ का गीतमा कविराज गहतराजले कोरियोग्राफी गरेका छन् । ‘तिम्रो छेउ सरुँकी म’ र ‘बरु अर्को जुनी’ गीतका कारण चर्चामा रहेको यो चलचित्रमार्फत् पहिलो पटक प्रियंका र आयुष्मान सिल्भर स्क्रिनमा देखिन लागेका हुन् । उनीहरु वास्तविक जीवनमा पनि प्रेममा छन् ।
ट्रेलर हेर्नुहोस् :-