‘माया बस्छ कि के हो ?’ मा कस्मता र सोनालको जोडी

निर्देशक राजु अधिकारीले ‘माया बस्छ कि के हो ?’ नामक चलचित्र निर्माण गर्ने भएका छन् । आइतवार राजधानीका एक कार्यक्रमका बीच निर्माण घोषणा गरिएको चलचित्रमा सोनाल तामाङ र कस्मता निरौला लिड रोलमा रहनेछन् । यो दुबैको डेब्यू चलचित्र हो ।

पारिवारिक लभस्टोरी तथा हाँस्य कथामा आधारित भएर बन्ने चलचित्रको असार दोस्रो साताबाट छायांकन सुरु हुने निर्देशक अधिकारीले जानकारी दिए । उनले चलचित्रलाई उत्कृष्ट बनाउन सक्दो मिहिनेत गर्ने प्रतिवद्धता व्यक्त गरेका छन् । नव-अभिनेता सोनालले आफूलाई दर्शकले अभिनेताको रुपमा स्वीकार गर्ने विश्वास व्यक्त गरे ।

नव-अभिनेत्री कस्मताले ‘माया बस्छ कि के हो ?’ मा आफ्नो चरित्रलाई न्याय गर्न कुनै कसर बाँकी नराख्ने बताइन् । चलचित्रको सम्पूर्ण छायांकन युरोपमा हुनेछ । जनपुकार मिडिया हाउस प्रा.लि.को ब्यानरमा निर्माण हुने चलचित्रको प्रस्तुतकर्तामा शरद अधिकारी छन् । छायाँकार रविन्द्र बरालले चलचित्र खिच्ने जिम्मेवारी पाएका छन् ।

बहादुर सिंह तामाङ र कृष्ण गिरी कार्यकारी निर्माता रहेको चलचित्रको कथा आरती अधिकारीले तयार पारेकी हुन् । पटकथा तथा संवाद मौनता श्रेष्ठको रहेको छ । चलचित्रको गीतमा अर्जुन पोखरेलको संगीत रहनेछ । सोनाल र कस्मतासँगै यसमा ध्रुव दत्त, बेनी ढुंगानालगायतका कलाकारहरुको पनि अभिनय रहनेछ ।