‘कप्स’ पोस्टरमा अनुपको पुलिसवाला लुक्स

जेठ १७ गतेबाट देशभर प्रदर्शनमा आउन लागेको चलचित्र ‘कप्स’ को दुई पोस्टर सार्वजनिक भएको छ । पोस्टरमा अभिनेता अनुप विक्रम शाहीलाई रिसाह लुक्समा देख्न सकिन्छ । चलचित्रमा उनी डिएसपीको भूमिकामा छन् । नव-अभिनेत्री सन्दिपा लिम्बु, अनुपा भट्टराई र अमित गिरी पनि पोस्टरमा फिचर्ड छन् ।

चलचित्रलाई सम्राट सापकोटाले निर्देशन गरेका हुन् । एक कर्तव्यनिष्ठ प्रहरीको कथामा चलचित्र आधारित छ । खलपात्रमा अत्याधिक रुचाइएका अनुपले यस चलचित्रमा एक सच्चा प्रहरी अफिसरको भूमिका निभाएका छन् । ‘कप्स’ बाट सन्दिपाले नेपाली चलचित्रमा डेब्यू गर्दैछिन् । चलचित्रले पोलिटिक्स, प्रहरी र जनताको कथा बोल्ने निर्देशक सापकोटा बताउँछन् ।

रामराज क्षेत्री, पुरन जोशी, नन्दु श्रीवास्तब, सुन्दर श्रेष्ठ, बब्लु विक्रम थापा, अनुपमा भण्डारी, रोशन सुवेदीलगायतका कलाकारहरुको पनि चलचित्रमा अभिनय छ । ‘आर्या मुभिज’ र ‘सारा श्री मुभिज’ को निर्माणमा बनेको चलचित्रमा सुशान्त प्रजापतिको छायांकन र अष्ट महर्जनको द्वन्द्व छ ।

एक्सन र लभस्टोरी जनरामा बनेको चलचित्रमा कविराज गहतराज र शिशिर खातीको नृत्य र विजय घिमिरे र स्वयम्भुराज शाक्यको संगीत छ । विपिन मल्लले चलचित्रको सम्पादन गरेका छन् । सञ्जय श्रेष्ठको ब्याग्राउण्ड स्कोर छ । चलचित्रलाई वि.के. फिल्मस् र जय श्री पाथीभराले वितरणको जिम्मा लिएका छन् ।