आँचल र प्रियंकाको पथमा पूजा

सुरक्षा भट्टराई | अचेल म्यूजिक भिडियोमा नेपाली चलचित्रका स्थापित अभिनेत्रीहरु देखिनुलाई कुनै नौलो कुरा मानिँदैन । एक दिनमा छायांकन सकिने र पारिश्रमिक पनि राम्रो पाउने हुँदा यसतर्फ अभिनेत्रीहरुको मोह बढ्दो छ । सबैभन्दा धेरै म्यूजिक भिडियोमा देखिने अभिनेत्रीहरुमा प्रियंका कार्की र आँचल शर्मा र वर्षा राउत पर्छन् । उनीहरु दैनिक भिडियोको छायांकनमा व्यस्त हुने गर्दछन् ।

शिल्पा पोखरेल, रिमा विश्वकर्मा, वर्षा सिवाकोेटी, केकी अधिकारीलगायत थुप्रै अभिनेत्रीहरु पनि भिडियोमा देखिँदै आएका छन् । यो भीडमा अभिनेत्री पूजा शर्मा पनि थपिएकी छन् । हुनत, उनको करिअरको सुरुवात नै भिडियोबाट भएको थियो । चलचित्र ‘प्रेमगीत’ ले नसोेचेको सफलता दिलाएपछि उनले भिडियोमा अभिनय गर्न पूरै छाडेकी थिइन् । तर, उनी फेरि आफ्नो पुरानो लयमा फर्किएकी छन् ।

अचेल उनलाई भिडियोमा अनुहार देखाउने भुत चढेको छ । गएको वर्ष प्रदर्शनमा आएको सुदर्शन थापा निर्देशित चलचित्र ‘रामकहानी’ मा निकै रुचाइएको जोडी आकाश श्रेष्ठसँग उनले छोटो समयमा नै दुई भिडियोमा काम गरिसकेकी छन् । अहिले पूजा अभिनीत ‘तश्बिर’ र ‘के गर्ने के गर्ने’ बोलको गीतले युट्युबमा राम्रो भ्यूज बटुलिरहेका छन् । दुईको जोडीलाई दर्शकले अत्याधिक रुचाएका छन् ।

चलचित्रसँगै भिडियोतर्फ पनि पूजाको व्यस्तता बढ्नुले कतै उनी आँचल, प्रियंका र वर्षाको पथमा त हिँडेकी होइनन् ? भन्ने चर्चा सिने नगरिमा सुरु भएको छ । हुनत, चलचित्रबाहेक अभिनेता/अभिनेत्रीलाई आर्थिक रुपमा सघाउन म्यूजिक भिडियो र विज्ञापनले ठूलो सहयोग गर्छ । के पूजाले पनि पैसाको लोभमा भिडियो गरिरहेकी हुन् ? प्रश्न उठ्नु स्वभाविक हो ।

भिडियोमा अभिनय गर्न थालेपछि अभिनेता वा अभिनेत्रीप्रति दर्शकको चासो घट्छ भनिन्छ । यसलाई बुझेर भिडियोमा भ्याइनभ्याइ हुने प्रायः अभिनेता/अभिनेत्रीहरुले बिस्तारै भिडियोको संख्या घटाउँदै लगेका छन् । कतिपयले त भिडियो गर्नै छाडिसके । पूजाले पनि भिडियोतिर आफूलाई व्यस्त बनाइरहे एकदिन चलचित्र करिअर न यता न उताको नहोला भन्न सकिन्न ।