पूजाको ‘पुलिस दाई’ सलोन

वास्तविक जीवनमा मिल्ने साथी रहेका अभिनेत्री पूजा शर्मा र अभिनेता सलोन बस्नेतले अहिलेसम्म साथमा चलचित्रमा काम गर्ने अवसर पाएका छैनन् । सुदर्शन थापाले चलचित्र ‘म यस्तो गीत गाउँछु २’ मा अभिनेता पलसँगै दुईलाई लिने घोषणा गरेका थिए । तर, यो चलचित्र बन्ने सम्भावना विस्तारै टर्दै गएको छ । वास्तविक जीवनमा निकै मिल्ने साथी रहेका दुईलाई एक चलचित्रको गीतमा भने ठुम्का लगाउँदै देख्न पाइने भएको छ ।

शोभित बस्नेतको निर्देशनमा बनिरहेको चलचित्र ‘बद्रीबहादुर’ को ‘पुलिस दाई’ बोलको गीतमा दुईले साथमा नृृत्य गरेका छन् । पूजा चलचित्रको गीतमा मात्र देखिनेछिन् । गीतमा सलोन इन्स्पेक्टरको पहिरनमा प्रस्तुत छन् । निर्देशक शोभितले गीतमा एक स्टार अभिनेत्री चाहिने भएका कारण पूजालाई रोजिएको बताए । उनले पूजासँग ‘रामकहानी’ र ‘म यस्तो गीत गाउँछु’ मा स्क्रिन साझेदारी पनि गरेका छन् ।

पूजा आफूले सलोनले अभिनय गरेका कुनै चलचित्र नछुट्याएको बताउँछिन् । उनी भन्छिन्, ‘उसले बाल कलाकारको रुपमा अभिनय गरेका चलचित्र हेरेर त म धेरै रोएको छु । म ऊदेखि फिदा थिएँ । ऊसँग मलाई बिहे गर्ने रहर समेत पलाएको थियो । म उसको अभिनयबाट निकै प्रभावित छु ।’ उनले सलोन चलचित्रको पिल्लर रहेको पनि बताइन् । सलोन पनि अभिनेत्री पूजाको प्रशंसा गरेर थाक्दैनन् ।

‘बद्रीबहादुर’ को ‘पुलिस दाई’ गीतमा टंक बुढाथोकीको स्वर, शब्द तथा संगीत छ । शिव विकको कोरियोग्राफीमा पूजा र सलोनले कम्मर मर्काएका छन् । विनोद सापकोटाले गीतको छायांकन गरेका हुन् । गीतमा पूजा र सलोनसँगै जयकिशन बस्नेतले पनि नृत्य गरेका छन् । छुल्ठिम गुरुङ, राजिवजंग बस्नेत, धिरेज शाक्य, लय संग्रौलालगायतका कलाकारहरु चलचित्रमा अभिनय छ ।