आउँदो आइतवारबाट प्रदर्शनको ५१ औं दिन पार गर्न लागेको अभिनेता अनमोल केसी र अभिनेत्री सुहाना थापा स्टारर चलचित्र ‘ए मेरो हजुर ३’ को नयाँ गीत सार्वजनिक भएको छ । ‘राधे कृष्ण’ बोलको गीत निर्माण टिमले बिहीवार युट्युबमा सार्वजनिक गरेको हो । चलचित्रमा यो गीतमार्फत् सुहानाको परिचय गराइएको छ ।
प्रविशा अधिकारी र सुरज लामाको गीतमा स्वर छ । प्रतिक पौडेलले लेखेको शब्दमा उनी स्वयंले संगीत भरेका छन् । सञ्जय लामाले खिचेको गीतको भिडियोमा कविराज गहतराजको कोरियोग्राफी छ । गएको बैशाखमा निर्माण टिमले अभिनेत्री सुहानाको जन्मदिनमा यस चलचित्रको सक्सेस पार्टी आयोजना गरिसकेको छ ।
चलचित्र प्रदर्शनको ५१ औं दिनको पूर्वसन्ध्यामा रहँदा निर्माता सुनिल कुमार थापाले कलेक्सन रिपोर्ट पनि सार्वजनिक गरेका छन् । चलचित्रले देशभरबाट ९ करोड ६३ लाख (ग्रस) को व्यापार गरेको छ । नेपालमा सानदार प्रदर्शन पश्चात् यो फिल्म अहिले विदेश यात्रामा छ । विदेशमा चलचित्रको डिमाण्ड उच्च रहेको निर्माता थापाले बताए । निर्देशक झरना थापा र अभिनेत्री सुहाना गएको शुक्रवार चलचित्रको प्रदर्शनका लागि युरोप उडेका छन् ।
यो चलचित्रबाट अभिनेत्री सुहानालाई भविष्यको स्टार भनिन थालिएको छ । उनको अभिनयको समीक्षक र दर्शक सबैले मुक्तकण्ठले प्रशंसा गरेका छन् । डेब्यू चलचित्रबाटै उनले लोभलाग्दो फ्यान फलोइंग बनाएकी छन् । चलचित्रमा उनले एक डाइहार्ट फ्यानको भूमिका निभाएकी छन् । ‘ए मेरो हजुर ३’ मा सलोन बस्नेत, अर्पण थापा, रेअर राई, सरोज खनाललगायतका कलाकारहरुको पनि अभिनय छ ।
गीत हेर्नुहोस् :-